Një ngjarje e rëndë ka ndodhur pasditen e djeshme në veri të Italisë, ku një shtetas shqiptar ka humbur jetën tragjikisht gjatë një ecjeje në mal.
Viktima është identifikuar si Gëzim Iljazi, 59 vjeç, banues në provincën e Rovigos.
Sipas raportimeve të mediave italiane, Iljazi po ngjiste i vetëm një shteg pranë ujëvarave të Stulles, në provincën e Bolzanos, kur humbi ekuilibrin dhe ra nga një lartësi prej rreth 100 metrash.
Dëshmitarë okularë kanë deklaruar se fillimisht panë të binte çanta e tij, e më pas vetë personi.
Në vendngjarje mbërritën menjëherë forcat e policisë, një helikopter dhe ekipet e shpëtimit malor, por për 59-vjeçarin nuk mund të bëhej më asgjë, pasi ai kishte ndërruar jetë në vend./ Zoom.al
