Sfida mes dy skuadrave më të njohura të kryeqytetit, KF Tirana dhe Partizani, që zhvillohet këtë të premte në orën 19:00 në “Air Albania Stadium”, do të shoqërohet me masa të rrepta sigurie.

Policia e Tiranës ka njoftuar një plan të detajuar për garantimin e rendit, parandalimin e incidenteve dhe menaxhimin e fluksit të tifozëve.

Segmentet që do të bllokohen
Duke filluar nga ora 17:00, deri në përfundim të aktivitetit, qarkullimi do të kufizohet në disa nga akset kryesore pranë stadiumit:

• Sheshi “Nënë Tereza”,
• Rruga “Lekë Dukagjini”,
• Rruga “Dervish Hima” dhe zonat përreth.

Itineraret e tifozëve
Për të shmangur përplasjet, janë përcaktuar rrugë të veçanta për lëvizjen e tifozëve të të dy ekipeve:

• Tifozët e Tiranës do të nisen nga “Teatri i Kukullave” përgjatë rrugës “Xhorxh Bush”, do të kalojnë në rrugën e “Elbasanit” pranë Ambasadës së SHBA-së, për të hyrë në tribunën “S”.
• Tifozët e Partizanit do të lëvizin nga ura e “Vasil Shantos” dhe rruga “Sulejman Delvina”, për të hyrë në tribunat “N” dhe “E”.

Kontrolle dhe rregulla
Para hyrjes në stadium, tifozët do t’i nënshtrohen kontrolleve të imtësishme fizike për sende të ndaluara si: objekte të forta, lëndë piroteknike, çadra apo shishe qelqi. Gjithashtu, çdo person duhet të ketë me vete një dokument identifikimi.

Policia ka paralajmëruar se:

• Nuk do të lejohen persona pa dokument identifikimi.
• Fëmijët nën 16 vjeç nuk mund të hyjnë pa prind ose kujdestar ligjor, pavarësisht nëse kanë bileta.
• Të ashtuquajturit “tifozë problematikë”, të evidentuar më herët nga autoritetet, do të ndalohen të futen në stadium./ Zoom.al

Postime të lidhura

• 
  Derbi Tirana-Partizani/ Policia plan masash, rrugët që do të bllokohen 
• 
  Derbi Tirana-Partizani/ Tifozët e dy skuadrave përplasen në rrugët e kryeqytetit
• 
  Forca e tifozëve, sporti duhet të bashkojë dhe jo të ndajë
• 
  Tirana-Partizani/ Policia publikon planin e masave: Rrugët që do të bllokohen dhe apeli për tifozët