Një ngjarje e rëndë është shënuar në Siçili të Italisë, ku një autobus shkolle është përfshirë në një aksident rrugor dhe ka përfunduar i përmbysur në anë të rrugës pas përplasjes me një automjet tjetër.
Në mjet ndodheshin nxënës të shkollës, së bashku me mësues dhe staf ndihmës bashkiak, të cilët po udhëtonin për qëllime shkollore.
Sipas autoriteteve lokale, nga aksidenti janë lënduar gjithsej 13 persona, mes tyre tetë nxënës, dy mësues, dy asistentë dhe drejtuesi i autobusit. Dy prej fëmijëve raportohet se kanë pësuar lëndime më serioze dhe janë nën kujdes të shtuar mjekësor, por nuk ndodhen në rrezik për jetën.
Ngjarja ka ndodhur rreth orës 14:30 në një segment rrugor që lidh zonën me Borgata Costiera. Përplasja ka qenë e fortë, duke bërë që autobusi të humbasë ekuilibrin dhe të dalë nga rruga.
Menjëherë në vendngjarje kanë mbërritur shërbimet e emergjencës, përfshirë zjarrfikësit, policinë dhe disa autoambulanca. Të gjithë të lënduarit janë transportuar në spital për trajtim dhe kontrolle të mëtejshme mjekësore.
Autoritetet italiane kanë nisur hetimet për të zbuluar shkaqet e sakta të aksidentit dhe për të përcaktuar përgjegjësitë e mundshme./ Zoom.al
