Kur Kostaq Konomi iu afrua muajin e kaluar asaj që ai thotë se është toka e tij në bregdetin e Shqipërisë jugore, ai u përball me një gardh me tela me gjemba dhe me burra të veshur me uniforma të zeza, të cilët nuk e lejuan të hynte.
Më vonë, nga raportimet në media, ai mësoi se ajo tokë tashmë ishte bërë pjesë e një resorti luksoz të planifikuar nga investitorë ndërkombëtarë, mes tyre edhe Jared Kushner, dhëndri i Presidentit të Shteteve të Bashkuara, Donald Trump.
Prona, e cila ndodhet në një kodër të mbuluar me lule të verdha të egra dhe zbret drejt një gjiri të shkretë ku lopët enden në ujërat e cekëta, ishte konfiskuar një herë më parë nga shteti gjatë periudhës komuniste. Konomi nuk mund ta pranonte që kjo të ndodhte sërish.
“Isha gati të merrja pushkën dhe të filloja të qëlloja,” i tha Reuters-it Konomi, 81 vjeç. “Isha një fëmijë i vogël kur futa këmbët për herë të parë në atë ujë. Tani jam plak dhe më thonë se nuk mundem më.”
Konomi është një nga dymbëdhjetë banorët e fshatit Zvërnec që i thanë Reuters-it se tokat e tyre janë shitur padrejtësisht për zhvillim që prej vitit 2024 nga një person tjetër që pretendon pronësinë mbi to. Disa prej tyre i treguan Reuters-it dokumente pronësie dhe regjistra tatimorë, të cilët, sipas tyre, mbështesin pretendimet e tyre. Asnjëri prej tyre nuk ka marrë kompensim.
Reuters nuk gjeti prova për ndonjë shkelje nga ana e Jared Kushner-it, i cili nuk është drejtpërdrejt i përfshirë në mosmarrëveshjen e banorëve. Agjencia e lajmeve nuk arriti të përcaktojë se kush ishte pronari i ligjshëm i parcelave të ndryshme, të cilat janë objekt i një beteje ligjore që vazhdon ende.
Pretendimet ligjore të banorëve e ndërlikojnë edhe më shumë një projekt zhvillimi prej disa miliarda eurosh, i cili tashmë është i debatueshëm. Projekti përfshin një ishull dhe një pjesë të paprekur të territorit në kontinent, ku ndodhet edhe një ligatinë e mbrojtur që shërben si habitat për flamingot shtegtare, fokat dhe breshkat e detit.
Këtë javë, në Tiranë, shpërthyen protesta masive ku kërkohej ndalimi i punimeve, ndërsa edhe Bashkimi Europian ka shprehur shqetësime lidhur me ndikimin që projekti mund të ketë mbi faunën lokale.
Kryeministri Edi Rama, i cili e mbrojti marrëveshjen në një intervistë për Reuters këtë javë, këmbëngul se zhvillimi është i ligjshëm dhe se habitatet natyrore do të mbrohen.
Jared Kushner nuk iu përgjigj kërkesave për koment të dërguara përmes kompanisë së tij të investimeve, Affinity Partners.
Një kompani e quajtur Sazan Real Estate Development LLC, e cila po zhvillon projektin, nuk dha përgjigje ndaj pyetjeve lidhur me planet e saj apo mosmarrëveshjen për pronësinë e tokës. Një zëdhënës i kompanisë e referoi Reuters-in te një deklaratë të publikuar të premten në platformën X nga kryetari i kompanisë, Asher Abehsera./Reuters
Makinat përplasen kokë më kokë në Dhërmi, katër persona përfundojnë në spitalin e Vlorës
