Jared Kushner është i përfshirë në një projekt pasurish të paluajtshme në Shqipëri që ka shkaktuar protesta në të gjithë vendin, pasi firma e tij e investimeve, Affinity Partners, mbështeti një sërë projektesh turistike luksoze në bregdetin e Adriatikut.
Projekti prej 1.4 miliardë eurosh synon të transformojë një pjesë të Ishullit të Sazanit në një vendpushim luksoz, me hotele, vila, apartamente, një marinë dhe ambiente të tjera luksoze.
Nisma ka shkaktuar kundërshtim nga grupet mjedisore dhe aktivistët vendas, të cilët argumentojnë se kërcënon ekosistemin dhe se nuk ka transparencë të mjaftueshme në lidhje me rolin e investitorëve.
Kushner është një biznesmen amerikan dhe këshilltar i Presidentit të SHBA-së Donald Trump. Ai njihet si dhëndri i Trump dhe luajti rol në Shtëpinë e Bardhë gjatë mandatit të parë të presidentit amerolan, nga viti 2017 deri në vitin 2021, duke u bërë një nga figurat më me ndikim dhe më kontraverse të administratës.
Kushner është përfshirë në një sërë nismash diplomatike që përfshijnë Iranin, Ukrainën dhe Rusinë, duke marrë pjesë në bisedime që synojnë uljen e tensioneve dhe promovimin e marrëveshjeve të mundshme të paqes.
Në muajt e fundit, ai ka punuar përkrah të dërguarit kryesor të Trump, Steve Witkoff, në negociatat mbi programin bërthamor të Iranit dhe luftën në Ukrainë.
Në shkurt të vitit 2026, Presidenti Donald Trump e emëroi zyrtarisht të Dërguar Special për Paqen, duke i dhënë një rol formal në përpjekjet ndërkombëtare të ndërmjetësimit të administratës.
Karriera e dhëndrit të Donald Trump?
I lindur më 10 janar 1981, në Livingston, New Jersey, Kushner vjen nga një familje e pasur, aktive në industrinë e pasurive të paluajtshme. Babai i tij, Charles Kushner, themeloi Kushner Companies, një firmë zhvillimi dhe investimi në pasuri të paluajtshme.
Jared Kushner u diplomua nga Universiteti i Harvardit dhe më vonë mori një diplomë në drejtësi dhe biznes nga Universiteti i Nju Jorkut.
Përpara se të hynte në politikë, Kushner zgjeroi perandorinë familjare të pasurive të paluajtshme dhe në vitin 2006, në moshën 25 vjeç, bleu gazetën New York Observer. Më vonë ai u bë CEO i Kushner Companies, duke menaxhuar investime të mëdha në pasuri të paluajtshme në Nju Jork dhe gjetkë.
Në vitin 2009, Kushner u martua me Ivanka Trump, vajzën e Donald Trump.
Pas fitores së Trump në zgjedhjet presidenciale të SHBA-së në vitin 2016, Kushner iu bashkua Shtëpisë së Bardhë si këshilltar i lartë. Pavarësisht se nuk kishte përvojë qeveritare, ai mori një mandat të gjerë që përfshinte reformën e drejtësisë penale, politikën tregtare, modernizimin e administratës dhe diplomacinë e Lindjes së Mesme.
Lidhjet e Jared Kushner me Rusinë
Jared Kushner luajti një rol kryesor në Raportin Mueller, një hetim amerikan që vërtetoi ndërhyrjen ruse në zgjedhjet presidenciale të vitit 2016 dhe shqyrtoi nëse anëtarët e fushatës së Trump u koordinuan me zyrtarë ose ndërmjetës rusë.
Kushner u mor në pyetje nga hetuesit dhe përmendet disa herë në raportin përfundimtar për takimet e tij me ndërmjetës rusë, por ai nuk u akuzua kurrë.
Një nga arritjet më të rëndësishme të Kushnerit në qeveri ishte roli i tij në Marrëveshjet e Abrahamit, një seri marrëveshjesh që normalizuan marrëdhëniet midis Izraelit dhe disa vendeve arabe, përfshirë Emiratet e Bashkuara Arabe dhe Bahreinin.
Mbështetësit e tij i japin atij meritën për ndihmën në riformësimin e diplomacisë rajonale, ndërsa kritikët vënë në dyshim ndikimin e saj afatgjatë.
Megjithatë, ndikimi i tij i madh dhe lidhjet e drejtpërdrejta familjare me presidentin kanë tërhequr kritika nga kundërshtarët, të cilët argumentojnë se roli i tij i zbeh vijat ndarëse midis shërbimit publik dhe besnikërisë familjare.
Babai i tij, Charles, mori një falje presidenciale nga Trump në fund të mandatit të tij të parë, pasi u dënua në vitin 2004 për evazion fiskal dhe donacione të paligjshme të fushatës, një dënim që e çoi në dy vjet burg.
Në vitin 2025, gjatë mandatit të dytë të Trump, Charles u emërua ambasador i SHBA-së në Francë dhe Monako.
Interesat e Kushner në Lindjen e Mesme?
Pasi u largua nga qeveria në vitin 2021, Jared Kushner themeloi Affinity Partners, një firmë private kapitali e fokusuar në investime në Shtetet e Bashkuara, Izrael dhe rajonin e Gjirit.
Kompania tërhoqi vëmendje të konsiderueshme pasi mori mbështetje të konsiderueshme nga Fondi i Investimeve Publike, fondi sovran i pasurisë i Arabisë Saudite.
Kushner mbetet një figurë me ndikim në politikë dhe çështjet ndërkombëtare. Ndërsa ai ka qëndruar kryesisht larg fushatave të përditshme politike, marrëdhënia e tij e ngushtë me Trump dhe rrjeti i gjerë i kontakteve në Lindjen e Mesme vazhdojnë ta mbajnë atë në ktye të skenës globale.
Përkthyer nga Euronews
