Prokuroria e Elbasanit ka konfirmuar se i vrari në Burgun e Peqinit disa muaj më parë nga i dënuari me burgim të përjetshëm Sokol Mjacaj, është Arben Lleshi.
Familja refuzoi të varroste dhe kërkoi t’i bëhej ADN-ja, duke pretenduar se nuk ishte i afërmi i tyre.
Konfirmimi është bërë përmes gjurmëve të gishtërinjve. Ndërkohë trupi i pajetë i Arben Lleshit ndodhet në morgun e spitalit të Elbasanit, teksa me shumë gjasa ceremonia do mbahet nga Bashkia e Elbasanit.
Varrimi nga Bashkia
Instituti i Mjekësisë Ligjore ka bërë kërkesë në Prokurorinë e Elbasanit për nisjen e procedurave të varrimit të Arben Lleshit nga Bashkia, pasi familja e tij ka refuzuar të tërheqë trupin.
Mësohet se trupi i pajetë i viktimës nuk u tërhoq nga familjarë apo të afërm, të cilët e kanë braktisur për shkak të frikës së vijimit të sagës se hakmarrjes.
Në këto kushte sipas ligjit IML iu drejtua prokurorisë me kërkese me leje për të vijuar procedurat për varrimin. Zyrtarisht Prokuroria e Elbasanit tha se do ta miratonte lejen dhe më pas është drejtoria përkatëse pranë Bashkisë që kryen varrimin e Arben Lleshit.
Ngjarja
Arben Lleshi u qëllua për vdekje brenda burgut nga Sokol Mjacaj, një tjetër i dënuar me burg përjetë, për vrasjen e çiftit të turistëve në Shkodër. Po ashtu i plagosur mbeti Indrit Shaqja.
Hetuesit dyshojnë që Mjacaj ka vepruar dhe vrarë bashkëvuajtësin kundrejt pagesës, por nuk ka mundur ende të identifikojë urdhëruesit, teksa zyrtarisht u deklarua se të dënuarit kishin pasur grindje për shkak edhe të izolimit të Mjacajt në regjimin “41 Bis”. Mjacaj ka dhënë disa dëshmi para hetuesve, por këta të fundit thonë se ai jep alibi jo të besueshme, por po i keqorienton në pistat e hetimit.
Viktima Arben Lleshi ishte dënuar përjetësisht për vrasjen dhe më pas djegien e Agim Hoxhës në Britaninë e Madhe në 2012. Pas kësaj ngjarje, familja Lleshi humbi dhe 4 pjesëtarë. Dy xhaxhallarët e Arben Lleshit, Xhavit e Hajredin Lleshi u ekzekutuan përkatësisht në 2013 dhe 2016. Ndërsa u zhdukën dy djemtë e xhaxhallarëve të tij, Artan e Klevis Lleshi, fati i të cilëve edhe sot nuk dihet. /ZOOM.AL/
