Christian Eriksen ka dalë nga spitali dhe është kthyer në shtëpi pasi u rrëzua gjatë miqësores së Danimarkës me Ukrainën.

Pamjet filmike treguan Eriksenin duke shtrënguae gjoksin përpara se të rrëzohej në minutën e 65-të të ndeshjes ndërkombëtare të së dielës. Ndeshja në qytetin danez të Odense u ndërpre më vonë.

Eriksen iu vendos një pajisje kardioverter-defibriluese e implantueshme për t’u siguruar që ai mund të rifillonte karrierën e tij si lojtar pasi pësoi një arrest kardiak në Euro 2020.

Por ai konfirmoi në një postim në Instagram se kjo ishte një rrethanë tjetër: “Dua t’u bëj të ditur të gjithëve se po ia dal mbanë dhe se jam në shtëpi me familjen time.”

Ndërsa shtoi se: “Siç mund ta imagjinoni, marrja e një goditjeje nga ICD-ja ime ka pasur ndikim të madh si tek unë ashtu edhe tek familja ime, por dua t’i siguroj të gjithë se kjo ishte një situatë e ndryshme nga ajo që ndodhi në vitin 2021. Ndihem mirë dhe shërimi im ka filluar tashmë. Përveçse jam mirënjohës për mbështetjen dhe ndihmën e të gjithë lojtarëve dhe ekipit mjekësor në fushë, jam gjithashtu jashtëzakonisht mirënjohës ndaj mjekëve që janë kujdesur për mua dhe zemrën time gjatë viteve.

Falë ekspertizës së tyre, ICD-ja ime bëri pikërisht atë për të cilën ishte projektuar: më mbrojti kur kisha nevojë.

Për momentin, fokusi im është në rikuperim, kalim kohë me familjen time, të shkoj me pushime dhe të luaj futbolli me fëmijët e mi.”

Në vitin 2021, Eriksen u rrëzua gjatë një ndeshjeje të Kampionatit Evropian në Kopenhagen kundër Finlandës dhe iu nënshtrua një trajtimi CPR që i shpëtoi jetën pasi pësoi një atak kardiak.

Më vonë ai u pajis me një pajisje të veçantë për të aktivizuar zemrën, e njohur si një Defibrilator Kardioverter i Implantueshëm (ICD).

Pas shërimit të tij, Eriksen nuk ishte në gjendje të luante për Interin, të cilit iu bashkua nga Tottenham në vitin 2020, për shkak të rregullave në Itali që i ndalonin lojtarët të garonin ndërsa ishin të pajisur me një ICD. Kontrata e tij u ndërpre në vitin 2021.

Eriksen u rikthye në futbollin anglez në janar 2022 me Brentford përpara se t’i bashkohej Manchester United atë verë.

Ai bëri 107 paraqitje për United dhe shënoi tetë herë, duke fituar Kupën Carabao në vitin 2023 dhe Kupën FA në vitin 2024.

Eriksen u largua nga klubi në fund të kontratës së tij në vitin 2025 dhe aktualisht luan për skuadrën gjermane Wolfsburg.