Një ngjarje e rëndë ka tronditur juglindjen e vendit. Trupat e pajetë të dy personave, të identifikuar paraprakisht si emigrantë të paligjshëm, janë gjetur në zonën malore mbi fshatin Kamenicë në Korçë.
Sipas informacioneve të para, bëhet fjalë për dy të rinj të moshës afërsisht 25 dhe 30 vjeç. Kanë qenë banorë të zonës ose kalimtarë ata që kanë pikasur trupat dhe kanë njoftuar menjëherë forcat e policisë.
Nga këqyrja paraprake e kryer nga ekspertët mjeko-ligjorë në vendin e ngjarjes, në trupat e viktimave nuk janë konstatuar shenja dhune. Dyshohet se ata mund të kenë humbur jetën si pasojë e temperaturave të ulta.
Zona ku u gjetën trupat njihet si një nga shtigjet që përdoret shpesh nga emigrantët që vijnë nga vendet e Lindjes, të cilët hyjnë përmes kufirit grek me synim destinacionin final drejt vendeve të BE-së. Terreni i thyer dhe kushtet e vështira atmosferike e kthejnë shpesh këtë rrugëtim në një mision vdekjeprurës.
Policia dhe grupi hetimor ndodhen në vendngjarje dhe po punojnë për identifikimin e plotë të viktimave dhe zbardhjen e rrethanave të plota të kësaj tragjedie. Trupat pritet të transportohen drejt morgut të spitalit të Korçës për t’u nënshtruar autopsisë ligjore, e cila do të përcaktojë zyrtarisht shkakun e vdekjes.
Zoom.al do t’ju mbajë të informuar mbi çdo detaj të ri që do të dalë nga hetimet e policisë së Korçës.
