Mediat italiane raportojnë se shqiptarët, ende të paidentifikuar, u dogjën brenda në makinë teksa njëri prej tyre që ishte në timon, humbi drejtimin dhe për pasojë “BMW-ja” doli nga rruga dhe u përmbys pak metra më tutje.

Më pas mjeti shpërtheu në flakë, duke bërë që dy shqiptarët të ndërronin jetë në vend.

Në makinë ndodhej edhe një tjetër shtetas shqiptar, i cili, referuar mediave italiane, po lufton për jetën në spital.

Në momentin e aksidentit, ai ka dalë jashtë makinës teksa kjo e fundit rrokullisej, duke shpëtuar mrekullisht nga flakët.

Aksidenti i rëndë ndodhi mbrëmjen e të shtunës në zonën mes Colleferro dhe Anagni, në Itali.

Mjeti me të cilin po udhëtonin shqiptarët, sipas autoriteteve italiane, ishte i vjedhur, por nuk zbardhen më shumë detaje për aktivitetin kriminal të tyre.

Në vendin e ngjarjes, efektivët gjetën sende që përdoren për të grabitur makina, që u sekuestruan si prova materiale.

Autoritetet po hetojnë për shkaqet e aksidentit dhe për të zbuluar lidhjet e shqiptarëve me grabitjet e makinave.