Pak javë më parë, opinioni publik pa nëpërmjet mediave një prej aksioneve më të diskutueshme për prishjen e ndërtimeve pa leje kur fadromat e IKMT ia behën pa paralajmërim në Theth. Goditën disa ndërtime kioska, me dru apo edhe me beton.
Pamjet e ekskavatorëve në një nga parqet kombëtare më të bukura të Shqipërisë u përdorën nga propaganda si shembull i “shtetit ligjor” edhe pse në realitet treguan se ligji përdoret sipas dëshirës, sepse ai nuk ekziston kur pushteti pati dëshirë t’i lejonte ata banorë të ndërtonin.
Por sot Thethi i vërtetë është në Jalë. Dhjetëra vila luksoze po ngrihen pa leje në projektin “Folie Village”, të kompanisë “Solei & Sea”.
Kompania është në pronësi të Endri Mingollarit (90% të aksioneve) dhe Ardit Bajraktarit (10% të aksioneve). Por media të ndryshme thonë se pas kompanisë qëndron biznesmeni i njohur Alban Xhillari, mik i kahershëm i kryeministrit Edi Rama.
Kjo kompani ka përfituar statusin e “investitorit strategjik” në qershor 2023, me vendim të Komitetit të Investimeve Strategjike, që drejtohet nga kryeministri Edi Rama.
Nëse vetëm pak javë më parë shteti shembi dhjetëra kioska e ndërtime pa leje në Theth, tani hesht për vilat prej betoni që pushtojnë vijën bregdetare të plazhit të Jalit.
Policia arrestoi në fillim të gushtit Ludion X. 40 vjeç, inxhinier i kompanisë “Solei&Sea”, i cili u kap duke mbikqyrur punimet pa leje në “Folie Village”. Ky veprim i policisë u pasua me një lumë reagimesh në rrjetet sociale, me komentues që thonë se kjo ishte një farsë e zakonshme, pasi skandali nuk është përgjegjësi vetëm e inxhinierit, por para drejtësisë duhen çuar edhe ata që firmosin në hierarkinë e kompanisë.
“Farsë e zakonshme shqiptare, goditen më të dobëtit dhe peshqit e mëdhenj nuk preken,”- shkruan një komentues.
Ky rast tregon se ligji godet ashpër me ekskavatorë e fadroma vetëm banorët e pambrojtur të Thethit, por jo miqtë e fuqishëm të kryeministrit që hedhin beton në bregdet, në një tjetër pasuri kombëtare.
Nëse Thethi u përdor si show për të treguar forcën e shtetit dhe të ligjit, Jala është aty si provë e pakundërshrueshme se në këtë shtet ligji nuk është i barabartë për të gjithë dhe se ai aplikohet me forcë vetëm te qytetarët e thjeshtë. /Zoom.al
Festa e çmendur për titullin botëror të Spanjës përfundon në tragjedi, humb jetën 13-vjeçari
