Irani ka vendosur të pezullojë të gjitha kontaktet dhe negociatat indirekte me Shtetet e Bashkuara, në një moment kur tensionet në rajon vijojnë të përshkallëzohen.
Lajmi u bë i ditur nga agjencia iraniane Tasnim, e afërt me Gardën Revolucionare Islamike, e cila raportoi se vendimi lidhet me zhvillimet e fundit në Liban dhe shkeljet e armëpushimit nga Izraeli.
Sipas raportimeve, Teherani e konsideron situatën në Liban pjesë të marrëveshjes së përgjithshme të armëpushimit dhe pretendon se sulmet e vazhdueshme izraelite kanë minuar çdo mundësi për vijimin e dialogut.
“Për shkak të shkeljeve të vazhdueshme në Liban dhe në fronte të tjera, ekipi negociator iranian ka vendosur të ndërpresë përkohësisht komunikimet dhe shkëmbimin e mesazheve përmes ndërmjetësve”, thuhet në raportimin e Tasnim.
Më herët gjatë ditës, ministri i Jashtëm iranian Abbas Aragchi deklaroi se çdo cenim i armëpushimit në një zonë konsiderohet shkelje e marrëveshjes në tërësi.
Sipas tij, armëpushimi mes Iranit dhe SHBA-së duhet të respektohet në të gjitha frontet, përfshirë edhe Libanin.
“Çdo shkelje në një front përbën shkelje të plotë të armëpushimit. Për pasojat mbajnë përgjegjësi SHBA-të dhe Izraeli”, shkroi Aragchi në platformën X./ Zoom.al
