Trajneri Sylvinho ka vendosur të qëndrojë në krye të Kombëtares së Shqipërisë, duke rinovuar kontratën deri në korrik të 2026. Pas nënshkrimit, tekniku shprehu entuziazmin e tij për projektin dhe objektivat e ardhshme.
Në një postim në rrjetet sociale, Sylvinho shkruan se ky vendim i jep mundësinë të vazhdojë një projekt që është ndërtuar me punë të madhe, profesionalizëm dhe bashkëpunim mes stafit dhe lojtarëve. “Së bashku kemi arritur objektiva historikë: kualifikimin për herë të dytë në finalet e Kampionatit Evropian dhe për herë të parë në fazën playoff të Botërorit 2026. Këto arritje tregojnë përparimin dhe forcën kolektive të ekipit”, theksoi trajneri.
Ai shtoi se sfidat e ardhshme do të kërkojnë përkushtim të shtuar, punë të palodhur dhe vendosmëri nga të gjithë pjesëtarët e ekipit. “Qëndrojmë të fortë ditë pas dite, me vendosmëri dhe zemër. Forca Shqipëri!”, përfundoi Sylvinho./ Zoom.al
