Partia e Rumen Radevit, Bullgaria Progresive, duket se do të fitojë zgjedhjet parlamentare bullgare të së dielës, zgjedhjet e teta të përgjithshme në pesë vjet.
Me më shumë se 60% të votave të numëruara, partia e tij Bullgaria Progresive (PB) kryesonte me 45% të votave, sipas Komisionit Qendror Zgjedhor, një shumicë absolute prej të paktën 132 vendesh në parlamentin me 240 vende.
PB mundi koalicionin liberal PP-DB, i cili arriti në 15%, dhe partinë GERB të ish-kryeministrit Boiko Borisov, e cila kishte 13%, sipas komisionit.
Zgjedhjet u shpallën pasi qeveria e mëparshme u përpoq të miratonte një buxhet të diskutueshëm në dhjetor, duke shkaktuar protesta masive të cilat Radev, si president, i mbështeti.
“Njerëzit hodhën poshtë vetëkënaqësinë dhe arrogancën e partive të vjetra dhe nuk ranë pre e gënjeshtrave e manipulimeve. I falënderoj për besimin e tyre”, tha Radev në fjalimin e tij të fitores.
Ai premtoi të ndërtonte “një Bullgari të fortë në një Evropë të fortë”.
“Ajo që i duhet Evropës tani është mendimi kritik, veprimet pragmatike dhe rezultatet e mira, veçanërisht për të ndërtuar një arkitekturë të re sigurie dhe… të rikuperojë fuqinë dhe konkurrueshmërinë e saj industriale. Ky do të jetë kontributi kryesor i Bullgarisë në misionin e saj evropian”, tha ai.
Pikëpyetje mbi vdekjen e Enrik Mehmetit? Gazetari i kërkoi ndihmë të vëllait: Eja më shpëto
