Teksa parlamenti po diskuton disa projektligje të rëndësishme, si ai për studentët e mjekësisë që janë në protestë, ai për kanabisin dhe kur çështjes së inceneratorëve i ka dalë tymi, kryeministri Rama ka zgjedhur të bëjë sërish politikë me Kosovën.

Taktikë për të hequr vëmendjen nga çfarë po ndodh në parlament apo përdorim i situatës në Veri të Kosoës për “hall personal” siç thotë opozita, kryeministri Rama drejtoi një thirrje  për gjetjen e një zgjidhje, por që duket se i hedh më shumë benzinë zjarrit.

Së pari, kreu i qeverisë shqiptare, në mesazhin e tij në Twitter, flet për Kosovë të Veriut dhe jo për veriun e Kosovës, një terminologji kjo që duket e zgjedhur me qëllim për të treguar një ndarje administrative të re brenda territorit të Republikës së Kosovës.

Së paku kjo është një gafë e rëndë, nëse nuk fsheh pas planet për shkeputjen e kësaj zone nga Kosova si pjesë e planit të vjetër për shkëmbimin e territoreve, pas të cilit, sipas ish -këshilltarit të Presidentit Trump për sigurinë, John Bolton, qëndronte Edi Rama, Aleksandër Vuçiç dhe Hashim Thaçi.

Kosova nuk ka asnjë rajon brenda territorit të saj që ta quajë “Kosova e Veriut”. E thënë në këtë mënyrë kjo është një toponim. Si  orientim gjeografik, zona për të cilën flet kryeministri është veriu i Kosovës. Njësoj si të thuash veriu i Shqipërisë dhe Shqipëria e Veriut.

Së dyti, kryeministri i Shqipërisë përmend sërish rajonin e Donbasit si paralelizëm për veriun e Kosovës, një krahasim që nuk është bërë deri tani nga asnjë lider perëndimor.

Nëse nuk është e qëllimtë, Edi Rama së paku po e sjell Donbasin si shembull, teksa askush në Kosovë dhe as në perëndimin që e bëri Kosovën të pavarur dhe garanton sigurinë e saj, nuk flet për ndonjë rrezik të cënimit të integritetit territorial.

Në Shqipëri e Kosovë, kritikë e diplomatë e kanë akuzuar Ramën se po fut hundët në punë që nuk i takojnë dhe po përdor një taktikë përçarëse mes Shqipërisë e Kosovës.

Edi Rama ishte politikani më i ashpër në deklaratat e tij për situatën në veri të Kosovës dhe me një akt të paprecedent anuloi edhe mbledhjen e përbashkët mes dy qeverive.

Opozita në Shqipëri e ka akuzuar se po përpiqet ta tensionojë qëllimisht situatën në veri të Kosovës për shkak të problemeve që ai ka në Shtetet e Bashkuara të Amerikës me dosjen “McGonigal”, për të treguar se ai mund të luajë fijet e stabilitetit të Ballkanit nëse do të cënohet nga hetimi i FBI.

Pak javë më parë ai ndërmori një iniciativë të pakërkuar nga askush dhe të pakonsultuar me qeverinë e Kosovës duke dërguar një draft në Berlin e Paris, si zgjidhje për Asociacionin, draft për të cilin nuk ka asnjë reagim nga dy kancelaritë më të rëndësishme të Europës.

Por përpjekja e Ramës për t’u faktorizuar me Kosovën duket se s’ka fund. Në mesazhin e fundit sot ai merr përsipër t’i tregojë Bashkimit Europian se çfarë duhet të bëjë për të zgjidhur situatën mes Kosovës e Serbisë edhe pse askush s’i ka kërkuar asgjë në këtë drejtim. /Zoom.al

STATUSI I KRYEMINISTRIT EDI RAMA

BE-ja duhet të veprojë me vendosmëri për të siguruar një zbatim të shpejtë të Marrëveshjes Themelore. Rajoni ynë nuk mund të bëhet peng  i një krize të pafund mes Kosovës dhe Serbisë. Nuk mund të lejojmë që as Kosova Veriore, ku kufiri mes krimit të organizuar dhe politikës vendase është i paqartë, të bëhet një Donbass i Vogël nga një kryengritje e nxitur nga Rusia dhe as Dialogu të bëhet një lojë fajësimi të Ballkanit të Vjetër, nga mungesa e një vullneti real dhe të fortë të palëve të përfshira në të! Diskutimet janë të mira, por ajo që i nevojitet rajonit është një përparim para se të jetë tepër vonë.

The EU needs to act firmly to secure a swift implementation of the Basic Agreement. Our region cannot become a hostage of a neverending crisis between Kosova and Serbia. We cannot allow nor the Northern Kosova, where the line between organized crime and local politicis is blurred, to become a Little Donbass out of un upraise fueled by Russia and either the Dialogue to become an Old Balkan blame game, out of the lack of a real and strong will of the parties involved in it! Discussions are good, but what the region needs is a breakthrough before it is too late.