Platforma sociale TikTok është sërish e aksesueshme në Shqipëri, pas heqjes së masave të përkohshme që kishin kufizuar përdorimin e saj për rreth një vit. Vendimi u bë publik nga institucionet qeveritare, të cilat sqarojnë se tashmë po kalohet në një fazë monitorimi aktiv dhe bashkëpunimi me përfaqësuesit e platformës.
Sipas njoftimit zyrtar, rihapja erdhi pas një rivlerësimi institucional të situatës dhe pas vendosjes së mekanizmave të rinj mbrojtës, që synojnë rritjen e sigurisë në hapësirën digjitale, veçanërisht për fëmijët dhe të rinjtë. Autoritetet bëjnë të ditur se më herët këto instrumente nuk kanë qenë funksionale në të njëjtin nivel.
Ndër masat e përmendura përfshihen filtra përmes fjalëve kyçe, kontrolle më të avancuara të përmbajtjes si dhe procedura më efikase për raportimin dhe trajtimin e shkeljeve. Institucionet shqiptare theksojnë se tashmë ekziston një bashkëpunim i drejtpërdrejtë me TikTok për çështjet e sigurisë dhe moderimit të përmbajtjes.
Vendimi shënon kalimin nga kufizimi total i aksesit drejt një qasjeje të re, e cila kombinon lirinë e përdorimit me mbikëqyrje të shtuar dhe përgjegjësi të përbashkët mes shtetit dhe platformave digjitale.
Paralelisht, po përgatitet një program informimi dhe ndërgjegjësimi për përdorimin e sigurt të rrjeteve sociale. Ky plan do të synojë fëmijët, adoleshentët, prindërit dhe stafin arsimor, me fokus te edukimi digjital dhe parandalimi i rreziqeve online.
Bllokimi i TikTok ishte vendosur në vitin 2025 si një masë parandaluese, pas shqetësimeve të ngritura për ndikimin e përmbajtjeve në rrjetet sociale te të miturit dhe çështje që lidhen me sigurinë publike./ Zoom.al
