Ish-presidenti amerikan Donald Trump ka theksuar se qëllimi i tij është vendosja e një armëpushimi të përhershëm në Ukrainë, duke refuzuar idenë e një ndalese të përkohshme të luftimeve.
Deklarata u bë publike nga sekretarja e shtypit e Shtëpisë së Bardhë, Karoline Leavitt, menjëherë pasi Vladimir Putin njoftoi një pauzë të përkohshme ushtarake nga 8 deri më 11 maj, me rastin e 80-vjetorit të përfundimit të Luftës së Dytë Botërore.
“Presidenti Trump e ka bërë të qartë se dëshiron një ndalim të plotë dhe të qëndrueshëm të gjakderdhjes dhe luftimeve,” tha Leavitt.
Ajo theksoi gjithashtu se Trump mbetet optimist për mundësinë e arritjes së një marrëveshjeje, edhe pse po shfaqet gjithnjë e më i zhgënjyer nga lidershipi i të dy vendeve, të cilët sipas tij duhet të angazhohen në negociata serioze për t’i dhënë fund konfliktit.
Pavarësisht tensioneve, Trump u shpreh pozitiv pas takimit të tij me presidentin ukrainas Volodymyr Zelenskyy në Bazilikën e Shën Pjetrit gjatë funeralit të Papa Françeskut, duke vlerësuar se Zelenskyy po tregonte një qasje më të qetë.
Leavitt theksoi gjithashtu se Trump dëshiron të rikthehet si një “president paqebërës”, ashtu siç pretendon se ishte gjatë mandatit të tij të parë, dhe është i vendosur ta realizojë këtë objektiv sërish./ Zoom.al
