Premier League është tashmë një garë dyshe mes këtyre dy ekipeve, në një kohë kur Liverpool u ndal sërish, këtë herë në një barazim 2-2 përballë West Ham. Fundi i Jurgen Klopp në krye të ekipit të kuq po bëhet i hidhur pasi kundër tij doli në mënyrë demonstrative edhe Momo Salah.

Arsenal përfitoi nga blofi i “The Reds”, duke triumfuar në derbi përballë Tottenham. Ekipi i Arteta-s ishte i papërmbajtshëm në pjesën e parë duke shënuar tre gola. Hojbjerg ishte i pafat në minutën e 15-të duke devijuar topin në portë e tij. Në të 27-tën ishte Saka që konvertoi me gol një kundërsulm të shpejtë të “topçinjve” i ideuar nga Havertz me një super assist. Ylli gjerman ishte protagonist kryesor pasi në minutën e 38-të, me kokë në shtyllën e parë dërgoi topin në rrjetë. “Gjelat” u zgjuan në pjesën e dytë, fillimisht ngushtuan shifrat me Romero-n në minutën e 64-ët, ndërsa Son në të 84-tën realizoi edhe golin e dytë, por vetëm kaq, pa mundur t’i prishin festën Arsenal.

Mikel Arteta pranoi se në fund po lutej që të mbaronte ndeshja, ndërsa u shpreh i bindur se ekipi i tij do të luftojë deri në fund për titullin kampion: “Jam i sigurt 100% për këtë, djemtë do të luftojnë deri në fund. Ata besojnë ndeshje pas ndeshje, minutë pas minute, janë të motivuar. Ne do ta provojmë deri në fund”, theksoi Arteta.

Një fitore të pastër 2-0 në transfertë siguroi Man.City. Në letër duket si një fitore e lehtë, por nuk ishte kështu, të besuarit e Guardiola-s kishin dhe shumë fat në disa episode. Gvardiol me një goditje me kokë, gjatë zhvillimeve të një goditje këndi, kaloi Man.City në avantazh. Në pjesën e dytë, në minutën e 62-të, Guardiola hodhi në fushë Haaland. Biondit norvegjez i mjaftuan pak minuta për të realizuar golin e dytë për Man.City. Pas këtij suksesi, City ndjek Arsenal me një pikë larg, por “qytetarët” kanë një ndeshje me shumë në dispozicion.

Kurse trajneri i Cityt, Guardiola doli në konferencë pas ndeshjes, ku u shpreh se ekipi nuk duhet të lëshojë asnjë pikë deri në fund të sezonit.

“Ishte vërtet e vështirë, më e vështirë se sezonin e kaluar kur barazuam këtu. E dinim se do të hasnim vështirësi dhe ishim me fat që fusha ishte kaq e thatë… Nëse fusha do të kishte qenë të lagur, do të ishte më mirë për ta sepse kanë lojtarë të shpejtë. Ne preferojmë që Arsenal-i të humbasë, por nuk mund të kontrollojmë atë që bëjnë ata. Kanë mbetur katër ndeshje dhe nuk mendoj se mund të humbim pikë. Ne e dimë saktësisht se çfarë duhet të bëjmë, por sot rrezikuam”, shtoi Guardiola. /ZOOM.AL/