Izvin Gucija, autor i dyshuar i plagosjes në Shkodër mbrëmjen e së enjtes, është arrestuar nga policia në afërsi të banesës së tij.
Pak minuta pas ngjarjes, efektivët arritën që të kapin 40 vjeçarin, i cili qëlloi me armë ndaj 45-vjeçarit Genc Hoxha.
Ky i fundit mori një plumb në këmbë dhe është jashtë rrezikut për jetën.
Sipas burimeve, i plagosuri kishte çuar automjetin në servisin e autorit pranë urës Dervishbeg disa kohë më parë.
45-vjeçari nuk ka mbetur i kënaqur me shërbimin dhe ka shkuar para pak ditësh në servis ku ka fyer autorin e plagosjes, por ky i fundit nuk ka ndërmarrë asnjë veprim sepse ka qenë agjerueshëm.
Gjatë ditës së djeshme shtetasi Genc Hoxha ka shkuar sërish pranë servisit dhe në debat e sipër ka ndodhur edhe plagosja.
Efektivët kanë gjetur një gëzhojë në vendin ku ndodhi ngjarja që dyshohet se i përket autorit të arrestuar. Po ashtu uniformat blu kanë sekuestruar edhe armën e zjarrit pistoletë me të cilën dyshohet se ndodhi kjo plagosje.
Policia vijon punën për ta zbardhur të plotë ngjarjen.
