Mbrëmjen e sotme, kryeministri Edi Rama ka folur për herë të parë publikisht lidhur me akuzat për skandalin “McGonigal”.
Ai ka vendosur që, pas refuzimit për t’u përballur me opozitën në interpelancën e thirrur në Kuvend, të shfaqet nëpërmjet lidhjes në Skype në disa studio televizive njëra pas tjetrës, si një “One Man Show” në shumë siklet.
Duke parë “pushtimin” e ekrane e, mosshfaqja në parlament ngjan e qëllimshme, për ta vendosur të gjithë protagonizmin në orarin prime të mediave në vend, e cila mbledh gjithë publikun përballë ekraneve, por shmang përballjen dhe i jep mundësi kryeministrit të mbajë fjalime, veçanërisht kur bëhet fjalë për media miqësore me të.
Ai e ka nisur me shfaqjen në Top Channel ku pati përballë Grida Dumën, por u bëri bisht pyetjeve për McGonigal.
Pasi është larguar nga TCH, kryeministri është shfaqur në ekranin e EuroNews Albania, përballë Erla Mëhillit, ku ka ka pohuar se ka qenë vetë ish-agjenti i FBI-së që i ka kërkuar ta takojë. Mcgonigal, sipas kreut të qeverisë, ka ardhur bashkë me Agron Nezën, të cilin e ka prezantuar si bashkëpunëtor dhe mik të ngushtë.
Megjithatë Rama nuk ka shpjeguar sesi mundet një kryeministër të takojë një agjent të rangut të lartë në një organizatë të fuqishme si FBI dhe të mos e protokollojë takimin me të dhe as të mos informohet lidhur me figurën që qëndron përballë tij, ndërsa diskuton hapur me të për influencat ruse apo situatën në rajon.
Duke u përplasur disa herë me demokratin Agron Shehaj dhe analistin Andi Bushati, për të cilët nuk i ka kursyer ofendimet, në vetëm pak minuta Rama ka kërcënuar disa herë se do të largohet nga lidhja dhe ka mohuar të zezën shkruar në të bardhë, që moderatorja e lexonte drejtpërdrejt nga aktakuza.
Pavarësisht kërcënimeve, ishte Andi Bushati ai që u largua, duke e quajtur kryeministrin Rama “hajdutin më të madh të Shqipërisë”.
Duke mos pranuar asnjë nga pretendimet e ngritura dhe pa dhënë asgjë përveҁ lojërave të fjalëve, kryeministri është larguar drejt një ekrani tjetër, atij të MCN ku është vendosur përballë Ylli Rakipit dhe disa panelistëve. Fushatën e ofendimeve Rama nuk e ka ndalur, teksa ka etiketuar si xhuxhmaxhuxh njërin nga gazetarët në panel.
Njësoj si edhe në studio e tjera, ai sërish ka kërcënuar se do të largohet ndërsa ka mohuar që aktakuza të ketë lidhje me të, edhe pse në fakt, drejtësia amerikane e ka përfshirë në hetim emrin e kryeministrit.
Kryeministri e ka pranuar se ka pasur disa herë takime me McGonigal, por siҁ theksoi mbrëmjen e sotme “Nuk i jep askujt shpjegime për takimet e tij”, duke harruar se nuk është një adoleshent përballë prindërve strikt, por një kryeministër përballë popullit të këtij vendi. /zoom.al
