U tha që të ulin tarifat për disa nga shërbimet, por thelbi ishte te mënyra e të operuarit. Ai u kërkoi bankave që të ndjekin shembullin e e-Albania apo të AKSHI-t përsa i përket shpejtësisë në aplikimin e pagesave.

Por a mundet që bankat, të cilat kanë nivelet më të larta të sigurisë, të ndjekin shembullin e dy institucioneve që u përfshinë në atë që konsiderohet skandali më i madh i rrjedhjes së të dhënave personale?

Kush do t’u besonte më bankave të nivelit të dytë nëse të dhënat e qytetarëve do të dilnin në shesh siç dolën të dhënat e “Patronazhistëve”, ato të pagave apo të targave të makinave?

Ish -ministri i Drejtësisë, Eduard Halimi ngriti menjëherë të njëjtin shqetësim.

“Ti Kërkosh Bankave Ndërkombëtare Të Ndjekin Shembullin E Një “ Banana Republic” Me Të Dhënat Personale! Sot lideri i “patronazhistëve” që përdorën të dhënat e e-albania për 920.000 qytetarē u kërkoi Bankave Ndërkomabëtare të ndjekin shembullin e e-albania! A mund të ndodhë kjo? A mundet që Bankat Nderkombëtare dhe degët e saj të ndjekin modelin e propozuar të një “banana republic”? – shkruan Halimi.

Teksa risjell në vëmendje faktin se të dhënat personale që qytetarët ai besuan qeverisë tek e-albania, qeveria ua dha “patronazhistëve” dhe Partia i përdori për shantazh për të fituar zgjedhjet dhe se të dhënat personale mbi pagat apo targat që qytetarët ia besuan qeverisë, u shpërndanë masivisht, Halimi nënvizon se “të vetmet të dhëna personale që nuk janë keqpërdorur deri më sot janë të dhënat bankare të mbrojtura nga ligjet ndërkombëtare të bankave mëmë!”.

“Ti kërkosh bankave ndërkombëtare që ti besojnë të dhënat personale të qytetarëve “patronazhistëve “ të Partisë është po aq kriminale sa shpërndarja e të dhënave patronazhistëve”, shkruan ai, duke i sugjeruar kryeministrit që nëse e ka kaq për zemër digitaliziminm të zbatojë ligjin që e ka miratuar para 2 vjetësh për emrat e pronarëve përfitues të kompanive “ofshore “ që ka ndonjë bankë në ishujt Cajman apo kompanive që marrin koncesione qeveritare!

Përsa u përket çmimeve kryeministri mori si shembull biletat e transportit urban, të cilat do të bëhen të gjitha onlinë.

“Tani si mundet që për këto bileta me vlera të ulëta të paguhet komision sa gjysma e vlerës së biletës? Kjo do të thotë faktikisht, jo lehtësim shërbimi, por rritje çmimi. Ndërkohë që, qeveria në kushtet aktuale, dhe pse këtu nuk flasim për thjeshtë situatën aktuale, por në situatën aktuale qeveria subvencionon mbi 5 milionë euro, që çmimi i biletës të mos rritet për ata që marrin autobusin, qoftë brenda qytetit qoftë jashtë qytetit si rezultat i rritjes së çmimit të naftës. Tani si mundet neve t’ju themi atyre që “do ta merrni online shërbimin dhe do paguani komision”? Çfarë është kjo?” -tha Rama.

Por edhe me këtë qëndrim kryeministri bëri shënoi një autogol. Sepse nga njëra anë thotë se u jep 5 milionë euro subvencione kompanive private që kanë fituar kontratat për linjat urbane, nga ana tjetër u kërkon bankave që të paguajnë ata nga xhepi i tyre që biletat të mos rriten më. Pra, fitimi i kompanive të urbanëve të mos preket, por i bankave po.

“Është shumë më e thjeshtë të zbatosh ligjet që ke miratuar vetë sesa të kërkosh bankave që të shkelin ligjet ndërkombëtare të kompanive mëmë”, – i përgjigjet ish -ministri Halimi, duke theksuar po ashtu se “është e pakuptimtë që t’u kërkosh bankave bija në Shqipëri të ndjekin modelin e një “banana republic” që kemi ndërtuar me “sukses” të plotë këtu! /Zoom.al