Klubi i Futbollit të Dinamos u ngjit sërish në Kategorinë Superiore, por këtë sezon ai do të vijë me një tjetër emër.
Mediat sportive kanë raportuar se Dinamo do të ndryshojë emrin, logon dhe mënyrën e menaxhimit.
Skuadra do të quhet “Dinamo City”. Por ndryshimi thelbësor janë investitorët. Në fanellë do të mbajë mbishkrimi “Durrës Yachts & Marina”. Kjo është kompania që do të ndërtojë Portin Turistik të Durrësit.
Siç mëson Zoom.al, nëpërmjet këtij investitori, Dinamo do të marrë para që janë parashikuar të shkojnë në arkën e shtetit.
“Durrës Marina” është një kompani me ortak kompaninë “Ealge Hills Real Estate Development” të arabit Muhamed Alabbar dhe “Albanian Seaport Development Company”, një kompani shtetërore e krijuar posaçërisht për të realizuar projektin e portit turisti.
Kompania e arabit Alabbar zotëron 67 % të aksioneve, ndërsa kompania shtetërore 33 % të aksioneve.
Duke investuar në klubin Dinamo, “Durrës Marina” do të çojë aty edhe paratë që do të duhet të shkonin në arkën e shtetit dhe do të mund të përdoreshin për shtresa në nevojë, rritje pagash e pensionesh apo projekte nga të cilat përfiton i gjithë komuniteti.
Për çdo sponsorizim që do të bëhë “Durrës Marina” për Dinamon, 33 % e shumës janë para që duhet të përfundonin në buxhetin e shtetit.
Por veç sponsorizimit me paratë publike, qeveria do t’i dhurojë klubit Dinamo edhe tokë shtetërore. Mediat sportive kanë mësuar se gjithçka është vendosur pas një takimi që ka pasur presidenti i Dinamos, Ardian Bardhi me kryeministrin Edi Rama.
Toka në fjalë do të jetë në zonën e ish-Kënetës për të ndërtuar aty një kompleks sportiv.
Në takim është dakordësuar që Dinamo City të ketë bashkëpunim edhe me akademinë e Machester City, e cila do të ndërtohet në të njëjtën zonë sipas një marrëveshje të mundësuar nga kryeministri Rama.
Një tjetër investitor i Dinamo City do të jetë “Mektrin Motors”, një kompani që merret me shitjen e makinave të reja dhe të përdorura, pas të cilës qëndron bashkëshorti i kryetares së bashkisë së Durrësit, Emirjana Sako, e cila është akuzuar për si për projektin e portit, ashtu edhe për inceneratorët.
Sponsorizimi vjen ndërkohë që mbi projektin e Portit të Durrësit vijojnë të qëndrojnë pikëpyetje të mëdha, ndër më kryesoret mënyra e investimit, pasi kompania e Alabbar nuk i ka 2 miliardë dollarët që duhen për projektin, çka ka ngritur dyshime se aty mund të investohen edhe paratë e grupeve kriminale që veprojnë kryesisht mes Durrësit dhe Dubait. /Zoom.al
Festa e çmendur për titullin botëror të Spanjës përfundon në tragjedi, humb jetën 13-vjeçari
