Situata në Lindjen e Mesme po tensionohet më tej, pasi Irani ka ndërmarrë një valë të re sulmesh me raketa dhe dronë ndaj Emirateve të Bashkuara Arabe.
Sipas deklaratës së Ministrisë së Mbrojtjes së Emirateve, sistemet e mbrojtjes ajrore janë aktivizuar për të përballuar kërcënimet që vinin nga territori iranian. Autoritetet konfirmuan se zhurmat e dëgjuara në disa zona të vendit lidhen me ndërhyrjen e këtyre sistemeve, të cilat kanë kapur raketa balistike, raketa lundrimi dhe mjete ajrore pa pilot.
Burimet zyrtare bëjnë të ditur se mbrojtja ajrore ka qenë në gatishmëri të plotë, duke u angazhuar në mënyrë aktive për të neutralizuar objektivat që paraqisnin rrezik.
Ky zhvillim vjen vetëm një ditë pas një sulmi tjetër të atribuar Iranit, i cili kishte në shënjestër një objekt të madh nafte në Emiratet e Bashkuara Arabe dhe la të plagosur tre shtetas indianë. Ngjarjet e fundit kanë ngritur pikëpyetje serioze mbi qëndrueshmërinë e armëpushimit në rajon.
Ndërkohë, edhe pse tensionet janë rritur dhe janë shoqëruar me veprime ushtarake në zona strategjike si Ngushtica e Hormuzit, zyrtarë amerikanë kanë deklaruar se armëpushimi nuk konsiderohet ende i përfunduar, duke lënë hapësirë për zhvillime të mëtejshme diplomatike apo përshkallëzim të situatës./ Zoom.al
