Emisioni investigativ “Plug” në Syri TV ka publikuar dokumente dhe të dhëna që ngrejnë dyshime mbi mënyrën se si është menaxhuar koncesioni i Check-Up-it në Shqipëri, një prej kontratave më të debatuara në sektorin e shëndetësisë.
Sipas investigimit, kompania “3P Life Logistic”, në pronësi të biznesmenes Vilma Nushi, u shpall fituese e një kontrate me vlerë rreth 138 milionë euro, ndonëse ishte themeluar vetëm pak javë përpara nënshkrimit të marrëveshjes me shtetin shqiptar.
Dokumentet e publikuara tregojnë se procedura për koncesionin kishte nisur që në vitin 2014, ndërsa kompania fituese u krijua në dhjetor të atij viti. Pavarësisht kësaj, kontrata u firmos në janar 2015 nga Ministria e Shëndetësisë.
Sipas emisionit, Agjencia e Prokurimit Publik kishte konstatuar mospërputhje dhe probleme ligjore në dokumentacionin e kontratës. Një nga çështjet kryesore lidhet me mënyrën e pagesës së shërbimit dhe vlerën reale të kontratës, e cila sipas dokumenteve duhej të varej nga numri i kontrolleve të kryera.
Në qendër të debatit është vendosur edhe roli i ish-zv.ministres së Shëndetësisë, Milva Ekonomi, e cila sipas investigimit ka firmosur dokumente që autorizonin pagesat për koncesionin.
Nga investigimi pretendohet gjithashtu se kompania e Vilma Nushit nuk realizoi ndërtimin e 20 laboratorëve të parashikuar në kontratë, por përdori laboratorë të nënkontraktuar në disa qytete të vendit.
Një tjetër element i përmendur është edhe transferimi i rreth 1.1 milionë eurove nga kompania “Marketing & Distribution” drejt kompanisë “Victoria Construction”, e lidhur me ndërtimin e kullës “Ekspozita Building”. Sipas investigimit, kjo kompani lidhet me emrin e Ervin Matës.
Shkrimi:
Së pari, kjo kompani u themelua më 9 dhjetor 2014, ndërsa kontrata koncesionare u firmos dy ditë pa u mbushur muaji, më 7 janar 2015. Ndërkohë gara për koncesionin e Check-up, u shpall që në shkurt 2014. Thënë ndryshe 11 muaj përpara se të lidhej kontrata me kompaninë që Vilma Nushi themeloi një muaj përpara se të firmoste marrjen e koncesionit 138 milionë euro dhe çudia më e madhe qëndron te fakti se shpallja e fituesit zyrtarisht u bë më 6 tetor 2014, dy muaj përpara se të themelohej kompania që do të fitonte kontratën koncesionare.
Pas firmosjes së kontratës koncesionare në fillim të muajit janar 2015 nga Ministria e Shëndetësisë dhe kompania 3P Life Logistic, Agjencia e Prokurimit Publik refuzoi publikimin e kësaj kontrate pasi konstatoi shkelje të rënda ligjore. E para, kontrata u dërgua në APP pa numër protokolli dhe pa u firmosur nga titullari i institucionit, dhe e dyta ishte shuma totale që shteti shqiptar do të paguante në fund të 10 viteve koncesion si dhe mënyra e pagesës, që sipas APP, në formularin e dërguar nga MSH, deklarohej se pagesa për check-up do të kryhej në bazë të numrit të analizave që do kryheshin. Dhe këtu ka një mospërputhje në lidhje me vlerën totale të kontratës së nënshkruar.
Konkretisht, në formularin e dërguar me shkresën Nr. 3082/23 Prot. Datë 20.01.2015, në pikën 5 jepet vlera totale e kontratës 13.833.000.000 lekë, ndërkohë në formularin e dërguar me shkresën Nr. 3082/27 Prot datë 10.02.2015, në paragrafin IV.4, shkruhet shprehimisht se: Vlera reale do të jetë në varësi të numrit të kontrolleve. Gjashtë ditë më pas, Ministria e Shëndetësisë firmos edhe njëherë formularin e njoftimit të kontratës së nënshkruar, dhe më datë 19.02.2015 ministri i atëhershëm Ilir Beqaj, i delegon kompetencën vartëses së tij, Milva Ekonomi që të firmosë formularin e fituesit të kontratës koncesionare. Në këtë shkresë, përveç firmës dhe vulës së Ministrisë së Shëndetësisë, deleguar te Milva Ekonomi, saktësohet në pikën IV.3. se: Vlera totale e kontratës do të jetë 13.833.000.000 lekë, apo rreth 138 mln euro për dhjetë vjet. Ndërsa në pikën IV.4, saktësohet: Vlera e sipërcituar është vlera e dhjetë viteve të marra së bashku për numrin maksimal të kontrolleve për grupmoshën 40-65 vjeç. Vlera reale e kontratës do të jetë më e ulët pasi ajo do të llogaritet në varësi të numrit të kontrolleve që do të kryhen çdo vit. Do të mjaftonte vetë ky dokument, që minimalisht sot SPAK ta kishte marrë të pandehur zv. ministren asaj kohe, Milva Ekonomin, e cila me dashje i ka shkaktuar disa milionë euro dëm buxhetit të shtetit, pasi me firmën e saj ka kryer pagesa në kundërshtim me kushtet e parashikuara në kontratë.
Por skandalet nuk mbarojnë këtu. Në pikën 3, të kontratës, përcaktohet se: Operatori merr përsipër që të ndërtojë, pajisë me aparatura mjekësore të nevojshme, të operojë dhe menaxhojë 20 laboratorë. Por sipas dokumentit, të siguruar nga emisioni Plug, Vilma Nushi ndërtoi vetëm tre laboratorë edhe këta në magazinën e vet në Kashar, ndërsa në qytetet: Fier, Lezhë, Shkodër, Lushnjë, Korçë, Sarandë, Berat, Elbasan dhe Gjirokastër, ajo nënkontraktoi laboratorë të tjerë për kryerjen e analizave Check-Up. Kjo ndodhi për një arsye. Vilma Nushi sipas kontratës, 20 laboratorët do të duhet t’i ndërtonte në qendrat shëndetësore të Ministrisë së Shëndetësisë dhe në përfundim të koncesionit, ky investim do t’i mbetej si aset shtetit shqiptar. Gjë që nuk ndodhi asnjëherë. Sipas kontratës që shihni në ekran, nënshkruar mes kompanisë së Vilma Nushit dhe kompanisë Intermedica të deputetit të PS, Vasil Llajo, çmimi për një Check-Up te Intermedica për Vilma Nushin do të kushtonte 740 lekë me TVSH. Pra ndërkohë që shteti do t`i paguante Vilma Nushit 1844 lekë me TVSH për kryerjen e një pakete Check-Up, ajo e delegoi këtë shërbim te nënkontraktori për një çmim prej 740 lekësh me TVSH. Me vetëm këtë skemë, Vilma Nushi ka përfituar për çdo analizë rreth 11 euro. Gjithçka me firmën e hedhur nga ish-zv. ministrja Milva Ekonomi.
Në një përballje me gazetarin Freard Rista, zonja Ekonomi mohoi të kishte lidhje me këtë formular kontrate, pavarësisht se emri dhe firma e saj janë e zeza mbi të bardhë.
Kompania e Vilma Nushit, Marketing & Distribution, e cila ka në pronësi koncesionin e Check-up nëpërmjet kompanisë 3P Life Logistic, rezulton gjithashtu se ka financuar edhe kompaninë “Victoria Construction”, e cila po ndërton kullën Ekspozita Building.
Deri këtu do të ishte diçka normale nëse pas kësaj kulle nuk do të qëndronte një emër si ai i Ervin Matës, i arrestuar së fundi në Brazil me kërkesë të SPAK, për trafik droge. Konkretisht, në vitin 2018, kompania Marketing & Distribution, kalon për llogari të shoqërisë “Victoria Construction” një shumë prej 1.1 milionë eurosh. Nga të dhënat e bilanceve të kompanisë “Victoria Construction”, nuk specifikohet arsyeja pse Vilma Nushi i ka dhënë një shumë të tillë monetare kompanisë. Derdhja e parave u bë vetëm një vit përpara se të firmosej leja e ndërtimit për kullën “Ekspozita Building”. Pra në vitin 2018 Vilma Nushi paguan këstin e parë të parave për llogari të kompanisë së Luan Matës, ndërsa në vitin 2019, me firmë të Edi Ramës dhe Belinda Ballukut, u miratua dhe leja e zhvillimit. Kujtojmë se pikërisht në vitin 2018, kur Vilma Nushi ka deklaruar se ka futur për investim 1.1 miliardë lekë në kullën e Ervin Matës, ka marrë edhe dividendin e parë nga kompania e Check-up, në vlerën e rreth 1.2 miliardë lekëve, përafërsisht sa shuma që futi te kulla e Ervin Matës.
Edhe për këtë gjë zonja Ekonomi u pyet nëse ndjen ndopak përgjegjësi morale që me firmat e saj pasuron privatin, i cili më pas këto lekë të fituara nga taksapaguesit shqiptarë i investon tek personazhe me rekorde kriminale, por nuk ktheu përgjigje, duke kyçur gojën dhe nxituar këmbët për të votuar…
