As ëndrrat më të çmendura nuk do të kishin imagjinuar një skenar të ngjashëm, por gjithçka është e vërtetë.

Interi është kampion i Italisë për herë të 20-të në historinë e tij dhe fitoi yllin e dytë duke mposhtur Milanin në derbi, për më tepër jashtë shtëpisë.

Simone Inzaghi shkroi historinë e skuadrës së tij me një triumf të paralajmëruar prej disa kohësh.

Golat e Francesco Acerbi dhe Marcus Thuram bënë gjithçka të mundur, duke i dhënë Interit fitoren 2-1. Ndërsa Milani del sërish i mundur nga derbi.

Ndeshja u mbyll me momente tensioni mes dy skuadrave që çoi në përjashtimin e Theo Hernandez, Calabria dhe Dumfries, ndërsa tifozët e fundit kuqezi u larguan nga San Siro para fishkëllimës së fundit.

Është fjala e fundit në këtë derbi dhe në të gjithë kampionatin: Interi fitoi derbin e gjashtë radhazi dhe merr në shtëpi kampionatin e 20-të, që do t’i lejojë lojtarët të nxjerrin në pah yllin e dytë në fanellën e tyre.