Jo vetëm rasti i Dicka-s në ndeshjen Udineze-Roma, që i shpëtoi vdekjes në fushë për mrekulli, por një lajm tjetër, këtë herë i trishtë, vjen nga Italia.
Futbollisti 26-vjeçar Matia Giani ka ndërruar jetë në spital, pak pasi u rrëzua në fushë gjatë ndeshjes kundër Lanciotto Campi, e vlefshme për kampionatin Eccellenza Toskana.
Ai u transportua në spitalin e Firences, në gjendje shumë të rëndë dhe pavarësisht ndërhyrjes së mjekëve nuk ka arritur të mbijetojë.
26-vjeçari u rrit në nivelin e të rinjve mes Empolit dhe Pizës dhe ka luajtur për Kastelfiorentino që nga korriku i vitit 2022, kur iu bashkua atij ekipi nga Ponsako.
Vëllai i tij Elia është gjithashtu një futbollist dhe luan në Serinë C, për Fiorenzuola. /ZOOM.AL/
