Të gjithë mund ta kujtojnë intervistën e Muhamed Veliut të Top Channel me Mohamed El Alabbar të EMAAR Group në dhjetor të vitit të kaluar. Nga biseda midis dy Muhamedëve, qeveria na tregoi për një arritje të madhe; investimin e mbi dy miliardë eurove për transformimin e portit të Durrësit në një port turistik, më të madhin në Adriatik (shih intervistën më poshtë).
Kryeministri Edi Rama foli disa herë publikisht për këtë port. më 13 shkurt të këtij viti publikoi edhe disa foto të një projekti 3D se si do të dukej Durrësi, duke e trumpetuar projektin si arritje të madhe (fotot e projektit më poshtë në zoom.al).
Por çfarë ka ndodhur më tej?
Prej disa kohësh Zoom.al ka ndjekur nëpërmjet institucioneve publike ecurinë e marrëveshjes për transforminin e portit të Durrësit në një port turistik dhe të gjithë zonës në një hapësirë mikpritëse për turistët e shumtë të Mesdheut.
Zyrtarisht asnjë prej institucioneve nuk shprehet, por burime të Zoom.al konfirmojnë që projekti i madh ka dështuar dhe plani është reduktuar në vetëm ndërtimin e disa pallateve brenda hapsirës së portit. Asgjë më shumë.
Nuk do të ketë port jahtesh, nuk do të ketë port turistik, nuk do të ketë asnjë ngjashmëri me portin Al Rashid të ndërtuar nga EMAAR Group, që mban 500 jahte e varka turistike.
Përse dështoi projekti?
Një nga arsyet kryesore që përmendin ekspertët në institucionet që ne kemi kontaktuar, pa dashur të citohen, është pamundësia e zhvendosjes së portit industrial në një vend tjetër. Në të vërtetë Porti i Durrësit është edhe porti më i madhnë vend që mban peshën më të madhe të eksporteve dhe importeve. Zhvendosja e portit, apo ndërtimi i një porti tjetër është e pamundur, pa llogaritur shqetësimin që do të sillte për gjithë bizneset që e kanë të lidhur aktivitetin me transportin detar.
Gjithashtu kanë fuqi edhe një sërë marrëveshjes ndërkombëtare për transportin detar ku Shqipëria aderon dhe porti i Durrësit është i vetmi që i përmbush standardet aktualisht.
Bllokimi i punës së portit deri në transferimin e plotë të tij do të krijonte problem edhe për seriozitetin e Shqipërisë për respektimin e marrëveshjeve ndërkombëtare.
Një tjetër aryse për rrudhjen e projektit të portit turistik më të madh në Adriatik duket se janë edhe problemet e Mohamedit të EMAAR Group.
Nga disa burime të besueshme rezulton se edhe pasuria personale e Mohamed El Alabbar është tkurrur bashkë me ëndrrën e portit turistik.
Këto duket se janë arsyet kryesore përse projekti i transformimit të portit të Durrësit përfundoi nga një port me shumë jahte në një port me disa pallate në të dhe asgjë më shumë. Gjithçka do jetë si më parë, me ndryshimin e vetëm që do të kemi disa pallate brenda portit industrial.
Për t’idhënë aromë arabie, mundet që qeveria shqiptare t’i kërkojë ndërtuesit nga Dubai mbjelljen e disa hurmave arabie. Kjo mbase do përbëjë edhe ndryshimin e vetëm që mund të sjellë aty një ndërtues i huaj nga një ndërtues shqiptar. / Zoom.al
PROJEKTI 3D I PORTIT TE DURRESIT
Emiratet Arabe 2 miliard euro investim, transformohet Porti i Durrësit
Të lidhura
Comments 2