Presidenti Donald Trump i uroi ish-Presidentit Joe Biden shërim të shpejtë dhe të suksesshëm, pasi ai u diagnostikua me një formë agresive të kancerit të prostatës.
“Unë dhe Melania jemi të trishtuar të dëgjojmë për diagnozën e fundit mjekësore të Joe Biden. I shprehim urimet tona më të ngrohta dhe më të mirat Jill dhe familjes, dhe i urojmë Joe-t shërim të shpejtë dhe të suksesshëm”, shkroi Trump në Truth Social .
Biden, 82 vjeç, u vizitua javën e kaluar nga mjekët dhe u diagnostikua me kancer në prostatë të premten, me qelizat kancerogjene që ishin përhapur në kockë.
Ish-presidentët Barack Obama dhe Bill Clinton, si dhe ish-nënpresidentja Kamala Harris i uruan Biden shërim të shpejtë.
“Unë dhe Michelle po mendojmë për të gjithë familjen Biden”, shkroi Obama në X. “Askush nuk ka bërë më shumë për të gjetur trajtime revolucionare për kancerin në të gjitha format e tij sesa Joe, dhe jam i sigurt se ai do ta luftojë këtë sfidë me vendosmërinë. Ne lutemi për një shërim të shpejtë dhe të plotë.”
