Zgjedhjet parlamentare të mbajtura të dielën në Shqipëri janë përshkruar si të qeta dhe të organizuara mirë, por të shoqëruara me mangësi që kërkojnë adresim të mëtejshëm.
Në një deklaratë zyrtare, përfaqësues të Bashkimit Evropian përgëzuan autoritetet shqiptare për mbarëvajtjen e procesit dhe theksuan rëndësinë e reformave zgjedhore në rrugën e vendit drejt anëtarësimit në BE.
“Të dielën, populli i Shqipërisë ushtroi të drejtën e tij demokratike për të votuar, duke zgjedhur përfaqësuesit e tij në Parlament. Ne përgëzojmë të gjitha autoritetet kompetente që siguruan funksionim të qetë në të gjithë vendin”, thuhet në deklaratë.
Megjithatë, sfidat nuk munguan. Në deklaratë thuhet se “zgjedhjet në përgjithësi ishin konkurruese dhe të zhvilluara në mënyrë profesionale. Votimi u zhvillua në një mjedis shumë të polarizuar, në të cilin garuesit nuk gëzonin kushte të barabarta loje.”
Një shqetësim i ngritur ishte përdorimi i burimeve shtetërore nga partia në pushtet. “Për shkak të përdorimit të gjerë të burimeve administrative dhe ndikimit institucional, mund të ndodhë që shumica qeverisëse të ketë pasur avantazhin e të qenit në pushtet,” theksohet në raport.
Gjithashtu, janë raportuar akuza për presion mbi votuesit, kryesisht ndaj punonjësve të administratës publike. Megjithatë, autoritetet janë vlerësuar për nisjen e hetimeve lidhur me krimet zgjedhore. “Përpjekjet e koordinuara për të hetuar dhe ndjekur penalisht krimet zgjedhore janë një zhvillim i mirëpritur,” thuhet në deklaratë, duke nënvizuar se ndjekja e këtyre rasteve është “e nevojshme për të adresuar shqetësimet e vazhdueshme të keqpërdorimeve zgjedhore.”
BE bëri thirrje për unitet politik dhe vazhdim të reformave. “Të gjitha forcat politike duhet të sigurojnë funksionimin e vazhdueshëm të institucioneve të vendit Procesi i integrimit të Shqipërisë në BE është një objektiv strategjik kombëtar dhe një projekt për të gjithë shoqërinë”, thuhet në raport./ Zoom.al
Ylli Manjani shpërthen ndaj protestuesve: R*bt ku t’i keni, legena, ku*va e ku*varë
