Pas muajsh tensionesh dhe përballjesh të armatosura përgjatë kufirit izraelito-libanez, Izraeli dhe Hezbollahu kanë rënë dakord për një armëpushim të ri, i cili ka hyrë në fuqi gjatë pasdites së sotme.
Konfirmimi erdhi fillimisht nga Forcat e Mbrojtjes së Izraelit (IDF), të cilat njoftuan se marrëveshja po zbatohet, ndërsa theksuan se ushtria mbetet në gatishmëri të plotë në rast të ndonjë shkeljeje apo përshkallëzimi të situatës.
Zëdhënës të autoriteteve izraelite deklaruan se ndonëse armëpushimi ka hyrë në fuqi, forcat ushtarake do të vijojnë të monitorojnë nga afër zhvillimet në terren dhe do të reagojnë nëse konsiderohet e nevojshme për sigurinë kombëtare.
Marrëveshja është arritur me ndërmjetësimin e Shteteve të Bashkuara, Katarit dhe Iranit, të cilët kanë zhvilluar biseda intensive me palët për të shmangur zgjerimin e konfliktit në rajon.
Armëpushimi vjen vetëm një ditë pas hyrjes në fuqi të memorandumit të paqes mes Uashingtonit dhe Teheranit, dokument që synon uljen e tensioneve në Lindjen e Mesme dhe ndalimin e operacioneve ushtarake në disa fronte konfliktuale.
Përplasjet mes Izraelit dhe Hezbollahut u intensifikuan në fillim të marsit, kur grupi libanez ndërhyri në mbështetje të Iranit pas shpërthimit të konfliktit rajonal. Që prej asaj kohe, sulmet ajrore, bombardimet dhe shkëmbimet e zjarrit përgjatë kufirit kanë shkaktuar qindra viktima dhe dëme të konsiderueshme në të dyja anët.
Megjithëse gjatë muajve të fundit kanë ekzistuar disa marrëveshje të përkohshme për ndërprerjen e luftimeve, ato janë shoqëruar shpesh me akuza reciproke për shkelje dhe incidente të vazhdueshme ushtarake.
Një nga pikat kryesore të kuadrit të ri diplomatik është ndërprerja e menjëhershme e operacioneve ushtarake në Liban dhe në zonat e tjera të përfshira nga tensionet rajonale.
Marrëveshja përfshin gjithashtu angazhimin për respektimin e sovranitetit dhe integritetit territorial të Libanit, si dhe krijimin e kushteve për stabilitet afatgjatë në kufirin jugor të vendit.
Megjithatë, zyrtarët amerikanë kanë bërë të qartë se Izraeli ruan të drejtën për të vepruar në vetëmbrojtje në rast kërcënimesh të drejtpërdrejta ndaj sigurisë së tij./ Zoom.al
Protesta e 20/ Nis grumbullimi i qytetarëve te sheshi Skënderbej
