Një burrë ka fituar një pikturë origjinale të Pablo Picasso-s me vlerë më shumë se 1 milion euro në një llotari bamirësie.

Ari Hodara, një inxhinier dhe entuziast i artit, mësoi se ishte fituesi të martën kur iu përgjigj një video-telefonate nga shtëpia e ankandeve Christie’s në Paris.

“Nga mund ta di që kjo nuk është një shaka?” pyeti 58-vjeçari kur iu tha se ishte pronari i ri i veprës së vitit 1941 nga mjeshtri spanjoll.

Organizatorët thanë se më shumë se 120,000 bileta për shortin me çmime u shitën me nga 100 euro (87 paund; 118 dollarë) secila, duke mbledhur rreth 11 milionë euro (10 milionë paund; 13 milionë dollarë) për kërkimin mbi Alzheimerin.

Shorti ishte edicioni i tretë i llotarisë për mbledhjen e fondeve “1 Picasso për 100 euro”, e cila u themelua në vitin 2013.

Çmimi i këtij viti ishte Tête de Femme (Koka e një Gruaje), një portret me bojë gouache në letër i realizuar në stilin karakteristik të Picasso-s. Ai përshkruan partneren dhe muzën e tij, artisten surrealiste franceze Dora Maar.