Mohamed Salah ka shkaktuar një debat në Liverpool duke pretenduar se dëshiron të largohet nga Anfield pasi klubi “shkeli premtimet” që i kishte bërë.
Pas barazimit 3-3 me Leeds United, Salah i la të Kuqtë të habitur kur u tha gazetarëve në Elland Road se marrëdhënia e tij me Arne Slot ishte prishur, pasi u la në stol për ndeshjen e tretë radhazi.
“Dikush dëshiron që unë të marr të gjithë fajin. Klubi më premtoi shumë gjatë verës. Tani jam ulur në stol, kështu që mund të them se nuk e mbajtën atë premtim”, tha 33-vjeçari egjiptian për Viaplay.
Duke shtuar se: “Kisha një marrëdhënie të mirë me trajnerin [Slot]. Por papritmas nuk kemi asnjë marrëdhënie dhe nuk e di pse. Me sa duket, dikush nuk më do më në klub.”
Kontrata e Salah është e vlefshme deri në vitin 2027, pasi e ka zgjatur atë vetëm në prill pas negociatave të gjata dhe spekulimeve për një transferim.
Sipas raportimeve të medias, klubi kryesor i Arabisë Saudite, Al-Hilal, është ende i interesuar ta nënshkruajë atë, dhe kampionët turq Galatasaray janë përmendur gjithashtu në thashethemet e fundit për transferime.
Anësori, fitues i shumë çmimeve, bëri një njoftim domethënës përpara ndeshjes në shtëpi të së shtunës: “I telefonova prindërit e mi dhe u thashë të vinin në ndeshjen kundër Brighton. Nuk ka rëndësi nëse luaj apo jo. Do ta shijoj. Do të jem në Anfield dhe do t’u them lamtumirë tifozëve para Kupës së Kombeve të Afrikës, sepse nuk e di se çfarë do të ndodhë atëherë.”
Më 22 dhjetor, kombëtarja egjiptiane do të luajë ndeshjen e parë kundër Zimbabvesë në turne në Marok. Salah do të udhëtojë për t’u bashkuar me ekipin.
Veterani ka luajtur për Liverpoolin që nga viti 2017. Ai tha se situata e tij aktuale është “e papranueshme”, duke theksuar se: “Nuk mendoj se jam unë problemi. Kam bërë kaq shumë për klubin”.
Salah iu referua gjithashtu sezonit fitues të titullit të sezonit të kaluar, ku ai ishte golashënuesi më i mirë me 29 gola. Ai ka kontribuar me 250 gola dhe 116 asiste në 420 ndeshje për Reds. Ai renditet i treti midis golashënuesve më të mirë të klubit pas Ian Rush (346) dhe Roger Hunt (285)./Zoom.al
