Presidenti i Serbisë, Aleksandar Vuçiç, iu drejtua publikut pas mbledhjes urgjente të Këshillit për Sigurinë Kombëtare, të cilën e thirri për shkak të “krimeve të papara në skenën politike ndërkombëtare”.
Përgatiti Zoom.al
Ai fillimisht u uroi të gjithëve Vitin e Ri dhe festat e ardhshme, dhe më pas i përgëzoi pensionistët që marrin pensione të rritura.
“Në mbledhjen e sotme kishim tri tema: e para është siguria ushtarake dhe politike rajonale, me vështrim ndaj situatës në Evropë dhe në botë. E dyta është siguria energjetike e Serbisë, dhe e treta është aksioni amerikan në Venezuelë”, tha ai në fillim.
“Kemi miratuar përfundimet përkatëse, disa do t’ua them, disa jo. Ne jemi të vetëdijshëm për kompleksitetin e pozitës që vendi ynë ka në këtë rajon, në Evropën Juglindore, dhe sigurisht ky kompleksitet i pozitës sonë do të bëhet edhe më i theksuar duke pasur parasysh faktin se rendi i vjetër në botë po rrënohet dhe se më asnjë rregull nuk vlen”, shpjegoi Vuçiç, duke shtuar: “E drejta ndërkombëtare publike nuk ekziston, rendi i OKB-së ekziston vetëm në letër. Për ne, si vend i vogël, mbetet të angazhohemi për këtë, por duhet ta kuptojmë mirë – pas aksionit në Venezuelë tani është plotësisht e qartë – se Karta e OKB-së nuk funksionon.”
Në botë dominon e drejta e forcës dhe e drejta e më të fortit, shpjegoi Vuçiç, duke shtuar se “kush është më i fortë, ai edhe shtyp”.
“Ky është i vetmi parim i politikës bashkëkohore që sot ekziston në botë. Mjaftonte të shihnit se si reagojnë përfaqësuesit e institucioneve evropiane dhe të vendeve evropiane ndaj asaj që ndodhi në Venezuelë,” tha ai.
Më pas shpjegoi çfarë donte të thoshte me këtë: “Kanë interesat e tyre të vogla, por nuk guxojnë të thonë çfarë mendojnë, sepse nuk e dinë çfarë do të ndodhë me Grenlandën.”
“Na shqetëson veçanërisht armatosja e Prishtinës”
Vuçiç më pas u ndal te situata në rajon.
“Ne na shqetëson veçanërisht armatosja e mëtejshme e Prishtinës, si dhe aleanca me Kroacinë dhe Shqipërinë. Planifikojnë të zhvillojnë sisteme më komplekse dhe dua të them se Serbia e ndjek këtë me vëmendje. Jo vetëm që e ndjekim, por po përgatitemi edhe për mbrojtje nga ata që hapur i dërgojnë kërcënime vendit tonë. Besojmë se forca jonë do të jetë faktor i mjaftueshëm parandalues dhe se do ta arrijmë qëllimin tonë të parë, që është ruajtja e paqes në Serbi”, tha Vuçiç.
Për forcimin e ushtrisë
Presidenti shtoi se është folur edhe për plotësimin e mëtejshëm të njësive tona speciale.
“Do të kemi përforcime të rëndësishme të kapaciteteve tona ushtarake. Në një vit e gjysmë të ardhshëm do t’i dyfishojmë kapacitetet tona ushtarake”, njoftoi ai.
• Vuçiç: Serbia i dyfishon kapacitetet ushtarake për 100 për qind – mund të mbështetemi vetëm te vetja
• Vuçiç paralajmëron pas aksionit kundër Maduros: Në botë sot sundon ligji i më të fortit – na shqetëson armatosja e Prishtinës
“Nuk e kam fjalën vetëm për numrin, por për fuqinë e zjarrit dhe gjithçka tjetër. Një pjesë të armëve i sigurojmë këtu, një pjesë jashtë vendit. Kjo është e vetmja mënyrë e sigurt për ta mbrojtur vendin tonë në të ardhmen dhe i vetmi faktor real parandalues. E patë në Venezuelë – mund të mbështetemi vetëm te vetja”, tha Vuçiç dhe shtoi: “Edhe nëse disa nga rajoni do të niseshin kundër nesh, askush nuk do të na ndihmonte përveç nesh vetë. Amerika nuk do të na sulmojë. Këta nga rajoni nuk e kanë bërë këtë si lodër, e kanë bërë me urdhër të të tjerëve.”
Ai paralajmëroi edhe forcimin e njësive të tjera, përfshirë edhe ato policore, dhe theksoi se është i sigurt se do ta ruajmë paqen.
“Ne e ruajmë paqen duke mos sulmuar askënd, por duke pasur një forcë të madhe parandalimi. Për pak më pak se një vit do të prezantojmë sisteme të tilla që nuk do ta besoni se është e mundur që Serbia t’i ketë”, tha Vuçiç.
“Tani nuk ekziston rrezik nga ndonjë agresor potencial, por kjo mund të ndryshojë në të ardhmen e afërt dhe prandaj duhet të jemi më të fortë se çdo sulmues i mundshëm”, i siguroi ai qytetarët.
Për aksionin amerikan në Venezuelë
“Më tej, folëm për sigurinë energjetike dhe duhet të them se po ndodhin ndryshime të mëdha në botë. Nuk e di nëse e keni vënë re që Trump ka themeluar, krejt publikisht, një organizatë për dominimin e SHBA-së në sferën e energjetikës në botë”, deklaroi Vuçiç.
Pastaj shtoi se është dhënë urdhër që të gjitha agjencitë të bëjnë analizat e tyre për strategjinë e re amerikane të sigurisë kombëtare.
“Pra, për këtë lëvizje në Venezuelë ata morën mbështetje vetëm nga tri vende: Milei në Argjentinë, Ekuadori dhe vendi i tretë është Panamaja. Këto janë tri vendet që i mbështetën. Dhe keni vendet më të rëndësishme që dolën fort dhe ashpër kundër kësaj: Meksika dhe Brazili”, tha ai dhe shtoi: “Kjo është veçanërisht e rëndësishme sepse presidenti Lula është gjithçka, përveçse mik i presidentit Maduro. U shprehën shumë ashpër kundër ndërhyrjes amerikane. Reagimet evropiane janë: ‘na vjen mirë që nuk ka më Maduro’, por ‘duhet të respektohet Karta e OKB-së’.”
Më pas, Vuçiç theksoi se pozicioni i Serbisë është i qartë, njësoj si kur filloi lufta në Ukrainë.
“Ne duam miqësi me SHBA-në, por është më se e qartë se këtu ka shkelje të së drejtës ndërkombëtare publike. Ka edhe problem të dominimit të legjislacionit të brendshëm mbi normat ndërkombëtare. Ne i urojmë popullit mik të Venezuelës të rimëkëmbet dhe ta ndërtojë vendin e vet. Kjo do të jetë shumë e vështirë. Këta që erdhën nuk janë ndonjë çlirimtarë; edhe ne kishim të tillë që vendosnin lokatorë, e pastaj e shkatërruan vendin pas 5 tetorit”, kujtoi Vuçiç.
Presidenti Aleksandar Vuçiç foli se si arrestimi dhe ekstradimi i Slobodan Millosheviçit në Vidovdan përbënte një poshtërim të madh për Serbinë.
“Ne atë njollë nga fytyra jonë kurrë nuk do të mund ta lajmë, çfarëdo që të mendoni për të. Askush më në botë nuk mundohet as ta ‘paketojë’ këtë, siç bëhej, për shembull, në gjyqin e Shesheljit. E rrëmbyen kreun e shtetit dhe thonë se do të përgjigjet sipas ligjeve të tyre”, theksoi Vuçiç.
Për situatën në Lindjen e Mesme
Ai komentoi edhe situatën në Lindjen e Mesme:
“Nuk është më mirë situata as në Lindje. A është në Siri situatë e mrekullueshme? I pengonte Asadi, që ishte ‘zuzar dhe diktator’, në kohën e të cilit nuk kishte përndjekje të të krishterëve dhe alavitëve. Sapo u hoq nga pushteti, vrasjet filluan maksimalisht dhe kjo askujt nuk i pengon. Tani vijnë ato historitë romantike se ai presidenti i ri i Sirisë qenka i pashëm. E sa njerëz ka vrarë, kë i intereson. Me rëndësi është që janë marrë vesh për naftën. Shihni si na poshtërojnë mediat liberale në botë; nuk kam dëgjuar askënd të flasë se si i vrasin njerëzit nëpër rrugë, i tërheqin si Gadafin. Kjo është ajo që na shesin. Është e qartë se amerikanët duan dominim të plotë në të gjithë botën në energjetikë, por edhe një lloj shkëputjeje dhe marrëveshjeje me Kinën”, tha ai.
Vuçiç shtoi se Amerika ka lejuar eksportin e mikroprocesorëve më të rëndësishëm në Kinë, gjë që më parë nuk ndodhte, dhe se është e qartë që ka bisedime mes Uashingtonit dhe Pekinit.
Më pas theksoi rëndësinë e mbështetjes në forcat e veta dhe të zhvillimit të pavarur të vendit:
“Duhet të zhvillojmë marrëdhënie të mira me të gjithë, por nuk mund të presim mëshirë dhe ndihmë nga askush. Pra, mund të presim vetëm diçka nga vetja, nga ajo që ndërtojmë dhe bëjmë ne. Sa më shumë punojmë, aq më të mirë dhe më të fortë jemi, dhe kemi besim te vetja dhe forcat tona. Askush nuk do të luftojë për Serbinë, sepse përveç Ushtrisë së Kuqe në Luftën e Dytë Botërore, askush për Serbinë nuk ka luftuar”, theksoi ai.
Për veprimet e mëtejshme të Amerikës
Vuçiç komentoi edhe situatën gjeopolitike dhe veprimet e pritshme të SHBA-së dhe shteteve të tjera, sidomos lidhur me Venezuelën dhe Kubën.
“Nëse kjo nesër ndodh në Lindjen e Evropës ose në Azi, kush do të thotë se për herë të parë ndodhi diçka e tillë. Mos harroni se miqtë tanë të mirë nga Kuba janë në situatë të vështirë edhe për shkak të Venezuelës. Kanë ndërprerë furnizimet me naftë për Kubën, për shkak të disa marrëveshjeve me amerikanët. Venezuelës askush nuk mund t’i ndihmojë përveç popullit të vet. Që dikush të nxjerrë një deklaratë, nga ato punë s’ka gjë. Më falni që jam brutalisht i sinqertë”, tha ai.
“Pra, amerikanët synojnë dominim të plotë në kontinentin amerikan, gjë që nuk do të jetë e lehtë me Meksikën dhe Brazilin, dhe më tej synojnë Grenlandën. Sa i përket Venezuelës, jam i sigurt se këtë Machado nuk do ta vendosin presidente, sepse ajo e ka marrë Nobelin në vend të tij”, tha ai.
Pastaj komentoi aksionin amerikan në Venezuelë.
“Kapelë poshtë amerikanëve për punën e inteligjencës; i kanë blerë të gjithë, ashtu siç e mbaruan Krajinen. Dhe asnjë tank i VRS-së dhe i JNA-së nuk u shfaq askund. Të hyni me shtatë helikopterë në disa ndërtesa, mendoj se kjo nuk mund të ndodhë askund, përveç në Vatikan, Luksemburg dhe San Marino”, shpjegoi ai dhe shtoi: “Përmasat e tradhtisë janë të pabesueshme. Sa i përket operacionit luftarak, ai ishte një ‘asgjë’ e madhe; gjithçka e bënë në mënyrë inteligjence. Amerikanët sot kontrollojnë 51 për qind të depozitave totale të naftës në gjithë botën! Dhe kjo pa Arabinë Saudite; ajo që është sot drejtpërdrejt në duart amerikane. Kinezët siguronin gjashtë për qind të nevojave të tyre nga Venezuela dhe mendoj se kjo është një nga arsyet pse amerikanët e bënë këtë”, tha Vuçiç.
Përgjigje ndaj pyetjeve të gazetarëve
Vuçiç iu përgjigj deklaratës së Ivan Videnoviçit se Serbia duhet të kthehet nga Rusia drejt Perëndimit, duke theksuar se pretendime të tilla duhen interpretuar si një formë autoprojektimi.
“Pra, ai thotë, ndoshta e dua më shumë veten. Jo, jam mjaft i moshuar që ta dua shumë, shumë më tepër vendin tim, Serbinë. Dhe kjo nuk është frazë; unë jetoj për Serbinë, Serbia për mua është gjithçka”, tha ai dhe shtoi: “Po të sulmohej ky vend, të gjithë në familjen time do ta mbronin këtë vend dhe nuk do të shkonin askund tjetër. Dhe unë jam i sigurt se kjo nuk do të ndodhë, sepse me politikë të mençur e ruajmë paqen.”
Më pas komentoi edhe pretendimet e Videnoviçit për Millosheviçin dhe Titon:
“Thotë Videnoviçi më tej: Millosheviçi i donte ata, Tito i donte ata… Tito nuk i ka dashur kurrë, as Millosheviçi, por u ka besuar. Kur e pyeta njëherë pse nuk e ndërpreu më herët agresionin e NATO-s, pas 15–20 ditësh, kur pamë se rezistenca ishte e pamundur. Nuk i erdhi mirë atëherë dhe kurrë nuk mora një përgjigje mjaft të mirë, edhe pse e pyeta edhe një herë. Tha: ‘Prisja rusët, prisja kinezët.’ Duhej ta dinte se kjo nuk ishte e mundur. Siç i pyeta edhe rusët pse e lanë Kosovën dhe kurrë nuk mora shpjegim racional”, theksoi ai.
Vuçiç tha se shumë njerëz ende jetojnë me frymën e viteve ’90, ndërsa sot situata është krejt tjetër.
“A jetojnë të gjithë në mënyrë të përsosur? Jo, kemi të varfër, prandaj luftojmë kaq shumë dhe bëjmë gjithçka! Rrisim pagën minimale, pensionet, gjithçka. Ekonomikisht, nuk ka pasur kohë më të mirë nga Karađorđe e deri sot. Faktet dhe numrat i zbulojnë të gjitha, ka statistikë dhe lehtë mund të përcaktohet. Prandaj besoj se viti 2026 do të jetë më i miri për ne”, tha ai.
Vuçiç theksoi edhe një herë se nuk ka ndërmend të arratiset askund, duke thënë se Serbia në kohën e tij nuk e ka braktisur vazhdimësinë juridike të Jugosllavisë që të shkatërrohej shteti i përbashkët.
Pastaj komentoi se reagimi rus ndaj situatës në Venezuelë ka qenë i përshtatshëm dhe i matur, duke theksuar se Rusia ka dënuar publikisht shkeljen e së drejtës ndërkombëtare.
“Mendoj se është krejt gabim të mendohet se kur rusët kanë konfliktin e tyre të madh, ndihmojnë një vend kaq të largët. Ata do të dalin në Këshillin e Sigurimit, do të flasë një diplomat i shkëlqyer, Nebenzja. Kjo është ajo që edhe ne duhet ta dimë: askush nuk do të na ndihmojë me ushtarë, me armë… Asgjë këtu nuk është e papritur; gjithçka që kushdo mund ta shihte qysh gjashtë muaj më parë. E njëjta ishte edhe në Siri. Kështu shkon. Fuqia e vendeve perëndimore të bashkuara është e madhe dhe SHBA-të janë ende fuqia dominuese në botë, me konkurruesin e vetëm Kinën. A ndryshojnë gjërat? Sigurisht. Kina rritet ekonomikisht, Rusia ushtarakisht, por Amerika është ende dominuese”, tha ai.
Duke komentuar deklaratën e Bojan Pajtiçit se ai nuk guxon të shkojë në Novi Sad dhe të shëtisë në qytet, Vuçiç tha se qytetarët janë lodhur nga arroganca dhe “terrori” i bllokuesve.
“Në Nish deri para tre muajsh nuk kishim asnjë shans për fitore, ndërsa tani po hapen dritare për fitore. E njëjta është edhe në Novi Sad. Nuk është puna ime të shëtis, por nga inati do të shëtis. Pastaj do të thonë, si në Nish: kjo është AI, agim… Shëtita në transmetim të drejtpërdrejtë, kur sheshi është më plot. Nga ura te kalaja deri te hoteli Ambasador. Pastaj thoshin se nuk guxoj në Medijana, e atje do të shëtis më së shumti. Po e shkatërrojnë Medijanën, atje bllokuesit janë në pushtet. A keni dëgjuar për ndonjë projekt, që kanë sjellë ndonjë fabrikë? Jo, as unë. A kanë bërë ndonjë rrugë? Nuk kanë”, theksoi ai.
Pas kësaj pyetjeje, ai iu përgjigj edhe akuzave të gazetarit Zheljko Veljkoviç se është diktator, duke thënë se është aq “diktator” sa çdo ditë mund ta fyejnë dhe ta krahasojnë me Hitlerin.
“Çështja e litiumit ende tërheq vëmendje”
“Ja, i tillë diktator jam. Diktatura e vërtetë ishte nga viti 2000 deri në 2012, kur nuk guxoje të thoshe asgjë, askund. Ndërsa unë jam krenar që i kemi duruar të gjitha vitet e fundit. Vetëm diçka të rëndësishme të them, të kthehem. Amerikanët në doktrinën e tyre do të shkojnë më tej në zotërimin e burimeve dhe metaleve të rralla. Dhe kjo që ndodhi këtu nuk kishte lidhje me amerikanët. Kishte lidhje me fuqi të tjera që na e krijuan temën e litiumit”, shpjegoi ai dhe shtoi: “A e mbani mend si dukej para dy vitesh në vendin tonë. Si me thënë, të gjithë do të vdesim. Pse ishte kështu? Disa vende të Evropës Perëndimore u frikësuan se Rio Tinto do ta bënte këtë me kinezët, ndërsa aktivistët pro-rusë u frikësuan për shkak të kompanisë perëndimore Rio Tinto. Dhe ne morëm vendim të gabuar. Dhe e mbani mend: doli rrjedhje në pus, lumi na u bë portokalli, na duheshin shampo speciale… A i mbani mend të gjitha ato budallallëqe, të cilat tani nuk ekzistojnë më. Dhe pastaj ne morëm një vendim budalla, ia preme vetes këmbën, dhe tani s’kemi asgjë nga ato lëndë të para. Nuk marrim asnjë dinar.”
Vuçiç theksoi sërish se çështja e litiumit vazhdon të tërheqë vëmendje:
“A e dini çfarë na kanë bërë tani me OKB-në? Lituania dhe Sllovenia, ose Austria – imagjinoni ‘ekspertin’, vetëm edhe kroatët të kishin sjellë. Dhe i sollën në Bor për të matur nivelin e ndotjes, në mes të korrikut. Kërkojnë të mbyllim gjithçka, të gjithë minierën, gjithçka. Natyrisht, prevarikatorët tanë i ndihmuan, të gjithë këta CINS, DINS, FINS, të paguar nga jashtë. Dhe qëllimi i dytë ishte që Serbia të mos krijonte avantazh krahasues në rajon. Ne do të ishim, po të nxirrnim litium, fuqi në rajon. Duhej ta ndalonin, e ndalën përparimin e shpejtë të Serbisë”, theksoi ai.
Në fund, ai theksoi se nuk duhet harruar se Venezuela ka qenë gjithmonë mike e Serbisë.
“Mos e harroni këtë – për Kosovën dhe Metohinë kanë qenë gjithmonë me ne. Dhe unë nuk kam thënë hapur e deri në fund çfarë mendoj për këtë aksion”, tha Vuçiç në fund. /Zoom.al
Festa e çmendur për titullin botëror të Spanjës përfundon në tragjedi, humb jetën 13-vjeçari
