Regjimi klerikal i Iranit tani përballet me mundësinë e gjetjes së një pasardhësi për Udhëheqësin Suprem Ajatollah Ali Khamenei pas vrasjes së tij në sulmet e përbashkëta SHBA-Izrael.
Udhëheqësi veteran, i cili sundoi me grusht të hekurt për gati katër dekada, nuk ka një trashëgimtar të deklaruar zyrtarisht. Në vend të kësaj, një organ i zgjedhur prej 88 klerikësh të lartë, i njohur si Asambleja e Ekspertëve, do të zgjedhë udhëheqësin e ardhshëm.
Është një detyrë që është kryer vetëm një herë nga organi klerikal që nga themelimi i Republikës Islamike në vitin 1979, kur Khamenei u zgjodh me nxitim pas vdekjes së Ajatollah Ruhollah Khomeini më shumë se tre dekada më parë.
Establishmenti qeverisës do të dëshirojë të veprojë shpejt për të treguar stabilitet në republikë, me anëtarët e asamblesë që pritet të mblidhen së shpejti për të diskutuar mbi kandidatët e mundshëm përpara se të emërojnë zëvendësuesin e Khameneit.
Por është e paqartë nëse ata mund të rrezikojnë, duke qenë se Presidenti i SHBA-së Donald Trump është zotuar se fushata e përbashkët e bombardimeve SHBA-Izrael që synon regjimin do të vazhdojë në ditët në vijim.
Juristët do të duhet të zgjedhin një pasardhës që përmbush kualifikimet e përcaktuara në kushtetutë. Udhëheqësi i ri duhet të jetë mashkull, një klerik me kompetencë politike, autoritet moral dhe besnikëri ndaj Republikës Islamike. Asambleja mund të interpretojë rregullat për të përjashtuar klerikët reformistë që favorizojnë liri më të mëdha sociale dhe angazhim me botën e jashtme.
Një nga pretendentët për këtë pozicion, sipas ekspertëve dhe analistëve është djali i liderit Suprem, Mojtaba Khamenei, 56 vjeç.
Djali i dytë i Khameneit, Mojtaba njihet për ndikim të konsiderueshëm prapa skenave dhe ka lidhje të forta me Trupat e Gardës Revolucionare Islamike (IRGC), organin ushtarak më të fuqishëm në vend, si dhe me forcën e saj paramilitare vullnetare Basij.
Por trashëgimia nga babai te djali nuk shihet me sy të mirë në establishmentin klerikal shiit mysliman dhe veçanërisht në një Iran revolucionar që u krijua pas rrëzimit të një monarkie gjerësisht të urryer. Një pengesë shtesë është se Mojtaba nuk është një klerik i rangut të lartë dhe nuk ka asnjë rol zyrtar në regjim. Ai u sanksionua nga SHBA-të në vitin 2019.
Labi premtoi 150 euro për Roelin nga çdo event, shpërthen Rezart Veleshnja: Shpati nuk lypi kurrë
