Të martën, më 10 qershor, Kombëtarja shqiptare do të përballet me Letoninë në ndeshjen e radhës të eliminatoreve të Botërorit 2026.

Në prag të kësaj përballjeje, UEFA ka zyrtarizuar emrat e arbitrave që do të vendosin drejtësi në fushën e lojës. Një trupë gjykuese nga Turqia do të drejtojë takimin.

Arbitër kryesor do të jetë Umut Meler, ndërsa Kerem Ersoy dhe Ibrahim Uyarcan do të jenë ndihmësit e tij. Arbitër i katërt është caktuar Oguzhan Cakir.

Emri i Umut Meler nuk është i panjohur për opinionin sportiv. Ai u bë i njohur në vitin 2023, kur pas një ndeshjeje mes Ankaragucu dhe Rizespor, u sulmua fizikisht me grusht nga presidenti i klubit vendas, një ngjarje që shkaktoi reagime të forta në arenën ndërkombëtare.

Presidenti i klubit nga Superliga turke u arrestua së bashku me dy zyrtarë të tjerë të klubit nga Ankaraja.