Izraeli dhe Libani kanë rënë dakord për një armëpushim të përkohshëm 10-ditor.
Lajmi është bërë publik nga Donald Trump, i cili në një postim në rrjetet sociale deklaroi se marrëveshja pritet të hyjë në fuqi brenda pak orësh. Megjithatë, deri në këto momente nuk ka ende një konfirmim zyrtar nga palët e përfshira.
Ky zhvillim vjen pas një përshkallëzimi të situatës në rajon, ku sulmet ajrore izraelite goditën infrastrukturë të rëndësishme në Liban, përfshirë një urë strategjike që lidh jugun me pjesën tjetër të vendit.
Trump zhvilloi një bisedë telefonike me Presidentin libanez, Joseph Aoun, ku fokusi i diskutimeve ishte te marrëveshja e armëpushimit me Izraelin. Presidenti libanez tha këtë të enjte se një armëpushim do të duhej të ishte hapi i parë i këtij komunikimi që mund të çojë drejt paqes.
Postimi i plotë i Donald Trump:
Sapo zhvillova biseda të shkëlqyera me Presidentin shumë të respektuar Joseph Aoun të Libanit dhe me Kryeministrin Bibi Netanyahu të Izraelit. Këta dy liderë kanë rënë dakord që, për të arritur PAQE mes vendeve të tyre, do të nisin zyrtarisht një ARMËPUSHIM 10-ditor në orën 5 pasdite (EST).
Të martën, të dy vendet u takuan për herë të parë pas 34 vitesh këtu në Uashington, D.C., me Sekretarin tonë të madh të Shtetit, Marco Rubio.
Unë kam udhëzuar Zëvendëspresidentin JD Vance dhe Sekretarin e Shtetit Rubio, së bashku me Kryetarin e Shefave të Shtabit të Përbashkët, Dan “Razin’” Caine, të punojnë me Izraelin dhe Libanin për të arritur një PAQE të qëndrueshme.
Ka qenë nderi im të zgjidh 9 luftëra në mbarë botën, dhe kjo do të jetë e 10-ta ime, ndaj le ta PËRFUNDOJMË!/ Zoom.al
