Prokuroria e Posaçme kundër Korrupsionit dhe Krimit të Organizuar (SPAK) ka dhënë pretencën për shtetasin kolumbian Samir Rosales Rodriguez, i konsideruar si kimisti i grupit kriminal që do të përpunonte dhe nxirrte kokainën nga laboratori i zbuluar në Frakull të Fierit.

Gjatë seancës gjyqësore, prokurori Adnan Xholi kërkoi dënimin e Rodriguez me 14 vite burg. Sipas SPAK, autoritetet shqiptare janë në pritje të ekstradimit të tij, pasi ai u arrestua në Kolumbi më 4 shtator të vitit të kaluar.

Nga hetimet ka rezultuar se Rodriguez kishte udhëtuar nga Kolumbia drejt Greqisë, më pas në Mal të Zi dhe në Shqipëri, me qëllim nxjerrjen e kokainës së përzier me pleh organik. Sipas Prokurorisë së Posaçme, sasia e lëndës narkotike që do të përpunohej arrinte në rreth 480 kilogramë.

Kolumbiani akuzohet për veprat penale “Trafikimi i narkotikëve”, kryer në bashkëpunim në kuadër të grupit të strukturuar kriminal, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

SPAK mbylli hetimet për këtë dosje në dhjetor të vitit 2023, duke marrë të pandehur ish-kryetarin socialist të ish-komunës Frakull, Viktor Çervanaku, si dhe 10 persona të tjerë, të akuzuar për trafikimin nga Kolumbia të 485.5 kilogramëve kokainë të përzier me pleh kimik.

Në dhjetor 2024, Apeli i GJKKO-së la në fuqi vendimin që dënoi me gjithsej 89 vite burg anëtarët e grupit kriminal. Mes të dënuarve ishte edhe Viktor Çervanaku, i cili mori 10 vite burg.

Si u zbulua laboratori i kokainës në Frakull

Më 24 nëntor 2022, në oborrin e banesës së Viktor Çervanakut në Frakull u sekuestruan rreth 600 thasë me pleh kimik. Pas ekspertizës, autoritetet zbuluan se në përbërjen e tyre ndodheshin rreth 485.5 kilogramë kokainë, e ardhur nga Kolumbia.

Operacioni u zhvillua nga SPAK në bashkëpunim me DEA-n amerikane dhe policinë malazeze, pas një hetimi disa mujor. Sipas hetimeve, lënda narkotike importohej nga Kolumbia, përpunohej në Shqipëri dhe kishte si destinacion tregun europian.