Hwang Ui-jo, një sulmues koreano-jugor, i cili luan për Norwich City që konkurron në kampionatin anglez të ligës së dytë, si i huazuar nga Nottingham Forest, është pezulluar nga të luajturit për ekipin kombëtar të Koresë së Jugut, pasi ai u akuzua për regjistrimin e një kasete seksuale me ish të dashurën e tij, pa pëlqimin e saj.
Skandali u ngrit pas ndarjes publike të Hwang Ui-jo me aktoren dhe këngëtaren Hyomin, të grupit të famshëm KPop T-ARA, në mars 2023. Në Korenë e Jugut, videot e futbollistit duke bërë seks me ish të dashurën e supozuar u zbuluan në internet, të ndjekura nga akuzat për mashtrim.
“Videot e zbuluara janë filmuar pasi ka arritur një marrëveshje me ish të dashurën e tij. Hwang është shantazhuar vazhdimisht që nga 7 maj 2023. Shantazhuesi zbuloi në mënyrë të paligjshme video të Hwang dhe ish të dashurës së tij, dhe megjithëse nuk mund të jemi të sigurt se është i njëjti person, ka pasur shpërndarje pa dallim informacioni dhe kërkesa financiare”, tha ekipi ligjor Hwang Ui-jo.
Hwang Ui-jo, i cili mohon akuzën e ‘kasetës seksuale’, nuk do të thirret në Korenë e Jugut
Sulmuesi 31-vjeçar, i cili mohon akuzën dhe mbron se videot i ka regjistruar me pëlqimin e gruas, nuk do të përzgjidhet për kombëtaren e vendit të tij, derisa të përfundojë hetimi i policisë për regjistrimin e videos së paligjshme seksuale.
“Ne kemi vendosur të mos zgjedhim Hwang Ui-jo për ekipin kombëtar derisa të arrihet një përfundim i qartë për faktet”, tha Federata Koreane e Futbollit (KFA). Hwang Ui-jo mund të humbasë Kupën e Azisë, e cila fillon më 12 janar në Katar.
“Gjithmonë ka spekulime, por derisa asgjë nuk vërtetohet… nuk e besoj. Unë e kuptoj plotësisht situatën aktuale dhe do të respektoj vendimin e Federatës Koreane të Futbollit. Gjithmonë ka spekulime, por derisa asgjë të mos vërtetohet… Nuk e besoj”, tha trajneri i Koresë së Jugut, Jurgen Klinsmann.
Gjatë gjithë karrierës së tij, Hwang Ui-jo, i cili ka shënuar 16 gola në 60 paraqitjet e tij për kombëtaren e Koresë së Jugut, ka luajtur për Seongnam, Gamba Osaka, Girondins, Nottingham Forest, Olympiacos, F. C. Seoul dhe Norwich City. /A.Q./
