“Drejtimi nuk është më sekret. Është çështje transformimit të këtij konflikti që ndizet ngadalë qe një kohë të gjatë ndërmjet Kosovës e Serbisë” thotë një burim nga Qeveri gjermane.

Siç mëson Gazeta Express ekskluzivisht nga burime zyrtare brenda Qeverisë Federale të Gjermanisë, Parisi dhe Berlini po synojnë që në mes të Kosovës dhe Serbisë të krijohet një situatë nga e cila përfitojnë të gjithë qytetarët në të dy shtetet.

Dy qendrat evropiane thonë se nëse konflikti i gjatë në mes të Kosovës dhe Serbisë “nëse nuk mund të zgjidhet në mënyrë të plotë, atëherë mund të gjendet zgjidhje të problematikave si adresat e faturave të energjisë, targat, pasaportat apo dokumentet e identifikimit dhe çështje të tjera që kanë potencial të rrisin tensionet në mes të Kosovës dhe Serbisë”.

“Ky është qëllimi i përpjekjeve tona”, ka thënë ky burim zyrtar brenda Qeverisë së Gjermanisë për Gazetën Express.

Nga Berlini dhe Parisi pasi kanë dorëzuar propozimet në Prishtinë dhe Beograd thonë se janë kthyer “optimistë të kujdesshëm” derisa njohin faktin se kanë ende shumë punë për t’u bërë.

Megjithatë si rezultat i vizitave në rajon, Gjermania dhe Franca mendojnë se Kurti dhe Vuçiq kanë kuptuar avantazhet e propozimit franako-gjerman, propozim për të cilin thonë se duhet “pragmatizëm nga njëra anë dhe gatishmëri për kompromis nga ana tjetër”.

Ky burim zyrtar nga Qeveria Gjerman shton tutje se propozimi ka edhe një sërë avantazhe dhe se shpresojnë se do të arrijnë në një përfundim në një të ardhme jo të largët.

“Sepse koha nuk është në favor të rajonit”.

Kur e thotë këtë, ky burim përmend situatë e rëndë të krijuar nga lufta në Ukrainë.

“Ne e shohim sa e paqëndrueshme është situata. Sa e cenueshme është situata ndaj krizave. Mbi të gjitha ne shohim gjithashtu se për momentin jemi përballë sfidave të mëdha që rrjedhin nga situata e re gjeopolitike”, ka thënë ky burim.

Berlini dhe Parisi presin që edhe shtetet e Ballkanit Perëndimor duhet të nxjerrin përfundimet e tyre nga situata e re gjeopolitike që është krijuar dhe kërkojnë guxim nga Kosova dhe Serbia për të gjetur një zgjidhje meqë ritheksojnë se s’ka vend për konflikte si ky mes Kosovës dhe Serbisë që në çdo moment mund të shpërthejë.

“Kjo do të thotë se ne thjesht nuk kemi vend për konflikte si ai ndërmjet Kosovës dhe Serbisë, të cilat mund të ndizen sërish çdo ditë. Tashmë kërkohet një udhëheqje e guximshme nga qeveritë e të dy vendeve. Këto janë pritshmëritë e qarta të presidentit Macron dhe kancelarit Scholz”, ka thënë ky burim për Express.

Nga Berlini konsiderojnë se situata është jashtëzakonisht serioze dhe se është një lloj “momenti i të vërtetës për të gjithë”.

Ndërkohë nga Kurti e Vuçiqi presin që të përballen me përgjegjësinë që kanë.