Kuba përbën një kërcënim për sigurinë kombëtare për SHBA-në dhe gjasat për një marrëveshje paqësore nuk janë të mëdha, ka deklaruar Sekretari amerikan i Shtetit, Marco Rubio.
Komentet e tij vijnë vetëm një ditë pasi SHBA-të akuzuan ish-presidentin e Kubës, Raul Castro, për vrasje në lidhje me rrëzimin e dy aeroplanëve në vitin 1996 ku humbën jetën shtetas amerikanë.
Rubio tha se preferenca e Uashingtonit ishte “një zgjidhje diplomatike”, por paralajmëroi se Presidenti Donald Trump kishte të drejtën dhe detyrimin për të mbrojtur vendin e tij nga çdo kërcënim.
Ministri i Jashtëm i Kubës, Bruno Rodríguez, e akuzoi Rubion për “gënjeshtra” duke u shprehur se ishulli nuk kishte përbërë kurrë kërcënim për SHBA-në.
Duke folur me gazetarët të enjten, Rubio tha se diplomacia “mbetet preferenca jonë me Kubën”, por shtoi: “Po jem i sinqertë me ju, e dini, gjasat që kjo të ndodhë, duke pasur parasysh se me kë kemi të bëjmë tani, nuk janë të larta.”
Ai gjithashtu akuzoi Kubën se është “një nga sponsorët kryesorë të terrorizmit në të gjithë rajonin”, gjë që Rodríguez e mohoi me forcë në një postim në X.
Ministri i jashtëm kubanez kritikoi Rubion për përpjekjen për të “nxitur një agresion ushtarak” dhe akuzoi qeverinë amerikane për sulm “të pamëshirshëm dhe sistematik” të vendit të tij.
Kuba po vuan nga një krizë karburanti e përkeqësuar nga një bllokadë efektive e naftës amerikane, ndërsa është nën presion nga administrata Trump për të bërë një marrëveshje.
Qytetarët e saj janë përballur me ndërprerje të zgjatura të energjisë elektrike dhe mungesa ushqimore gjatë muajve të fundit.
Rubio tha se vendi kishte pranuar një ofertë të SHBA-së prej 100 milionë dollarësh (74.4 milionë paund) në ndihmë humanitare.
Trump është përpjekur vazhdimisht të ushtrojë presion mbi Kubën dhe ka diskutuar hapur përmbysjen e regjimit të saj komunist.
