Në Itali po zhvillohet referendumi për ndryshimet kushtetuese, ndërsa pjesëmarrja në ditën e dytë të votimit ka kaluar mbi 46%, duke reflektuar interes të konsiderueshëm nga qytetarët.
Reformat janë propozuar nga kryeministrja Giorgia Meloni dhe përfshijnë ndryshime në sistemin e drejtësisë, konkretisht ndarjen e roleve mes gjyqtarëve dhe prokurorëve. Kjo iniciativë ka shkaktuar debat të fortë politik, me opozitën që shpreh shqetësimin se këto ndryshime mund të rrisin ndikimin e qeverisë mbi sistemin gjyqësor.
Zhvillimet vijnë pas dorëheqjes së Cesare Parodi nga drejtimi i Shoqatës Kombëtare të Magjistratëve, një lëvizje që i parapriu intensifikimit të diskutimeve për reformën.
Sipas sondazheve të para të publikuara nga mediat italiane, gara rezulton shumë e balancuar. Mbështetja për ndryshimet kushtetuese luhatet mes 47% dhe 51%, ndërsa kundërshtarët rezultojnë me 49% deri në 53%, duke treguar një ndarje të thellë të opinionit publik.
Rezultatet përfundimtare pritet të përcaktojnë jo vetëm fatin e reformës, por edhe pozicionin politik të qeverisë së Melonit në vijim./ Zoom.al
