Një incident me zjarr ka shkaktuar frikë mes banorëve të kompleksit “Kadiu” në zonën e Ali Demit në Tiranë, gjatë natës, pasi flakët dhe tymi përfshinë një nga pallatet e kompleksit.
Sipas banorëve, zjarri dyshohet të ketë nisur nga një problem elektrik, ndërsa tymi u përhap me shpejtësi në shkallët dhe ambientet e përbashkëta të pallatit. Për shkak të situatës, shumë familje dolën jashtë banesave të alarmuara.
Dëshmitarët tregojnë se sistemi i alarmit është aktivizuar menjëherë, ndërsa energjia elektrike në pallat është ndërprerë gjatë incidentit.
Flakët dyshohet se kanë përfshirë kabinën e automateve elektrike, ndërsa një vajzë ka shfaqur probleme nga asfiksia e shkaktuar prej tymit dhe është transportuar në spital me ambulancë.
Ndërhyrja e zjarrfikësve bëri të mundur shuarjen e flakëve, ndërsa nuk raportohet për persona të tjerë të lënduar.
