Një ditë pas shkarkimit nga posti i nënkryetarit të Komisionit të Sigurisë, deputeti demokrat Flamur Noka ka hedhur akuza të forta ndaj Lulzim Bashës, që i qëndroi vendimit duke e shpjeguar sot në një deklaratë për mediat nga selia blu. Deputeti demokrat i është përgjigjur liderit të partisë së tij në Facebook.
“Me gojë e thotë që qëllimi është rrëzimi i Ramës, ndërkohë ky i fundit vazhdon të mbretërojë i qetë në pushtet për 12 vjet. Me vepra pengu i tij po e ‘lufton’ atë duke përjashtuar dhe përçarë demokratët”, shkruan Flamur Noka në Facebook.
Përplasjet e përsëritura me Lulzim Bashën por edhe deklarata pas mbledhjes së grupit parlamentar, mjaftuan që kreu i demokratëve të thërrasë mbrëmjen e të hënës 4 nënkryetarët për të vendosur mbi shkarkimin e Nokës. Vendimi për shkarkimin përpara se të shpërndahej nga zyra e shtypit të PD, Flamur Nokës iu komunikua në një bisedë telefonike nga Lulzim Basha.
