Një dietë e pasur me bimë me cilësi të lartë që përfshin drithëra, perime dhe fruta mund të parandalojë dëmtimin e funksionit njohës, edhe kur njerëzit e fillojnë atë dietë në fund të të 50-ave dhe të 60-ave, sipas një studimi të ri.

“Nuk është kurrë vonë për të filluar të hash shëndetshëm për të ulur rrezikun e sëmundjes së Alzheimerit dhe të lidhura me demencën”, tha autorja kryesore Unhee Lim, profesoreshë e Universitetit të Havait në Honolulu.

Të moshuarit që hoqën shumë ushqime të pashëndetshme nga dieta e tyre gjatë një dekade kishin një rrezik 11% më të ulët të sëmundjes së Alzheimerit dhe demencës në krahasim me të rriturit, dieta e të cilëve nuk ndryshoi, tha Lim.

Megjithatë, njerëzit që hanin gjithnjë e më shumë ushqime me bazë bimore të pashëndetshme, siç janë drithërat e rafinuara dhe ushqimet me sheqerna të shtuar, kishin rreth 25% më shumë gjasa të zhvillonin një lloj demence në fund të 10 viteve.

Përkufizimi i një diete me bazë bimore është i gjerë, thjesht kërkon që një person të përparësojë ngrënien e më shumë ushqimeve bimore sesa produkteve shtazore si mishi, qumështi dhe vezët.

Një person mund ta quajë veten vegan dhe megjithatë të mbijetojë me ushqime të sheqerosura, të mbushura me yndyrë dhe të përpunuara në nivel të lartë, të cilat dihet se dëmtojnë shëndetin.