Një ngjarje tragjike është shënuar pasditen e sotme në plazhin e Sektorit Rinia në Durrës, ku një pushues ka humbur jetën ndërsa ndodhej në det.
Sipas të dhënave paraprake, viktima është një burrë rreth 50 vjeç, i cili ende nuk është identifikuar nga autoritetet.
Burime nga vendngjarja bëjnë me dije se në momentin e incidentit nuk ka pasur vrojtues plazhi në detyrë.
Si pasojë, ndihma e parë është ofruar nga pushues të tjerë, të cilët megjithë përpjekjet nuk arritën të shpëtonin jetën e tij.
Ende nuk është përcaktuar shkaku zyrtar i vdekjes, hetimet janë në vazhdim për të zbuluar nëse bëhet fjalë për mbytje apo një problem të papritur shëndetësor, si një atak kardiak./ Zoom.al
