Një aksion i befasishëm i zhvilluar këtë të shtunë (18 prill) në Burgu i Peqinit ka zbuluar një arsenal të tërë mjetesh të rrezikshme të improvizuara brenda ambienteve të institucionit.

Gjatë kontrolleve të ushtruara nga Policia e Burgjeve, në bashkëpunim me struktura të tjera, janë sekuestruar dhjetëra armë të ftohta të improvizuara, që varionin nga thika dhe kaçavida të modifikuara, te gërshërë, pirunë, kabuj të shkrirë dhe sende të tjera të përshtatura për përdorim të rrezikshëm.

Operacioni përfshiu kontroll të plotë në të gjitha ambientet, nga qelitë dhe regjimi “41-bis”, deri te hapësirat e përbashkëta si biblioteka, palestra dhe kuzhina. Gjithashtu, u gjetën edhe pajisje elektronike që dyshohet se përdoreshin për komunikime të paligjshme ose për t’u kthyer në mjete të rrezikshme.

Autoritetet bënë me dije se gjatë aksionit janë përdorur teknologji të avancuara, përfshirë skanerë, detektorë specialë, dronë monitorimi dhe qen të trajnuar antidrogë, duke rritur ndjeshëm efikasitetin e kontrolleve.

Bilanci i operacionit nxori në pah një sërë shkeljesh serioze të rregullave të sigurisë, përfshirë ndërhyrje të paligjshme në rrjetin elektrik dhe posedim të materialeve të ndaluara. Në një rast është konstatuar edhe një sasi e dyshuar lënde narkotike, për të cilën kanë nisur menjëherë procedurat përkatëse.

Në vijim të masave të marra, autoritetet kanë vendosur transferimin e dy të dënuarve me burgim të përjetshëm, të cilët konsideroheshin me rrezikshmëri të lartë për sigurinë brenda institucionit.