Kryeministri Edi Rama, gjatë mbledhjes së Grupit Parlamentar të Partisë Socialiste, ku u prezantua nisma për ndryshime në Kodin e Procedurës Penale lidhur me mbrojtjen e 7 institucioneve nga pezullimi i detyrës, deklaroi se rasti i Belinda Balluku do të trajtohet me përgjegjësi nga shumica qeverisëse.
Në fjalën e tij, Rama theksoi se ndryshimet ligjore nuk kanë lidhje me rastin konkret të Ballukut, ndërsa nënvizoi se procesi për të do të ndiqet sipas procedurave parlamentare.
“Duke e mbyllur dua të them që nisma thjesht dhe vetëm adreson një… juristët e quajnë boshllëk, unë them një problem që nuk duhet të shfaqet më. Nuk duhet t’i shkojë në mend askujt që me fuqinë e prokurorit dhe verbërinë e gjykatësit të marrë peng një funksion kushtetues.”
Kreu i qeverisë sqaroi se çështja konkrete është një proces në Kuvendin e Shqipërisë dhe do të trajtohet me përgjegjësinë që shumica qeverisëse ka.
“Ndërsa rasti konkret është një proces në Kuvendin e Shqipërisë dhe do trajtohet me përgjegjësinë që ne kemi si shumicë qeverisëse. Kush i lidh këto të dyja edhe në aspektin kohor, nëse nuk gaboj në llogarinë e kohës, parlamenti do të shprehet më para për imunitetin dhe më pas do të shkojë në votë ky ndryshim. Kështu që nuk ka lidhje me rastin konkret”, tha Rama.
Festa e çmendur për titullin botëror të Spanjës përfundon në tragjedi, humb jetën 13-vjeçari
