Shumë udhëtarë kanë kuriozitet të dinë se cilat vende në avion ofrojnë më shumë siguri në rast aksidenti. Studime të ndryshme kanë analizuar të dhënat e aksidenteve ajrore për të dhënë një përgjigje sa më të saktë për këtë pyetje.
Një studim i publikuar nga TIME, i cili është mbështetur në të dhëna nga 35 vite aksidentesh ajrore, tregon se vendet në pjesën e pasme të avionit, sidomos ato në rreshtat e mesit, kanë përqindjen më të ulët të vdekshmërisë, me vetëm 28%.
Nga ana tjetër, vendet në mes të avionit, pranë korridorit, janë identifikuar si më pak të sigurta, me një normë vdekshmërie prej 44%.
Gjithashtu, vendet afër daljeve të emergjencës janë vlerësuar si më të sigurta në rastet kur kërkohet evakuim i menjëhershëm për shkak të ndonjë rreziku si zjarri apo tymi. Një shembull konkret vjen nga një aksident ajror në Indi, ku i vetmi i mbijetuar ndodhej pranë një daljeje emergjence në një Boeing 787-8 Dreamliner.
Sipas analizave, pjesa e pasme e avionit ka një shkallë vdekshmërie prej 32%, pjesa e mesit 39%, ndërsa pjesa e përparme 38%.
Po ashtu, pasagjerët që janë të ulur brenda pesë rreshtave nga daljet e emergjencës kanë një shans më të madh për të shpëtuar.
Ekspertët theksojnë se, pavarësisht këtyre gjetjeve, mundësia për t’u përfshirë në një aksident ajror mbetet jashtëzakonisht e vogël./ Zoom.al
