Partizani mund të mbetet shumë shpejt pa drejtor sportiv. Agim Ibrahimi ka vendosur të paraqesë dorëheqjen, vetëm pak muaj pasi mori detyrën në klubin e kuq.
Sipas burimeve pranë klubit, ish-futbollisti ia ka dorëzuar vendimin presidentit Gazment Demi, ndërsa tashmë mbetet në dorën e këtij të fundit të vendosë nëse do ta pranojë ose jo largimin.
Edhe pse drejtuesit kishin nisur punën për ndërtimin e skuadrës së sezonit të ri, bashkëpunimi mes palëve duket se është vështirësuar për shkak të mospërputhjeve në mënyrën e menaxhimit të klubit.
Burime pranë Partizanit bëjnë të ditur se Ibrahimi kishte kërkuar më shumë autonomi në vendimmarrje për çështjet sportive dhe dëshironte që ndërhyrjet në kompetencat e tij të ishin minimale. Megjithatë, këto kërkesa nuk u realizuan, çka çoi në vendimin e tij për t’u larguar.
Nëse dorëheqja zyrtarizohet, Partizani do të detyrohet të nisë kërkimet për një tjetër drejtor sportiv, në një moment kur përgatitjet për sezonin e ri janë në zhvillim./ Zoom.al
