Zëvendësministri i Jashtëm i Iranit, Majid Takht-Ravanchi, ka mohuar se Teherani po vendos mina në Ngushticën e Hormuzit, vetëm pak ditë pasi Shtetet e Bashkuara deklaruan se kishin goditur anije të pajisura për një operacion të tillë pranë korridorit të rëndësishëm detar.
Në një deklaratë për agjencinë e lajmeve Agence France-Presse, Takht-Ravanchi tha se Irani ka bashkëpunuar me disa vende për kalimin e sigurt të anijeve në këtë ngushticë strategjike.
“Disa vende kanë folur tashmë me ne për kalimin nëpër Ngushticë dhe ne kemi bashkëpunuar me to”, u shpreh ai.
Megjithatë, diplomati iranian paralajmëroi se vendet që, sipas tij, “iu bashkuan agresionit” kundër Iranit nuk duhet të përfitojnë nga kalimi i sigurt në këtë zonë.
Sipas Takht-Ravanchit, qëllimi i Iranit është të sigurohet që një luftë e tillë të mos i “imponohet” më vendit në të ardhmen.
Ai kujtoi gjithashtu zhvillimet e konfliktit të fundit, duke thënë se kur lufta nisi në qershor të vitit të kaluar, pas 12 ditësh u shpall një ndërprerje e përkohshme e luftimeve.
“Por pas tetë apo nëntë muajsh ata u rigrupuan dhe e nisën sërish”, deklaroi ai.
