Pas eliminimit nga Liga e Kampionëve ndaj Bodo/Glimt, Inter ka kthyer vëmendjen te dy objektivat e mbetur të sezonit: kampionati dhe Kupa e Italisë. Pavarësisht diferencës prej 10 pikësh ndaj Milanit në Serie A, drejtuesit e klubit po përgatisin një revolucion të vërtetë për verën e ardhshme.
Administratori Giuseppe Marotta dhe drejtori sportiv Piero Ausilio kanë nisur prej kohësh procesin e rinovimit të skuadrës dhe disa emra të rëndësishëm pritet të largohen. Në portë, Yann Sommer nuk pritet të rinovojë kontratën që skadon në fund të sezonit, ndërsa klubi synon të investojë te një portier më i ri.
Edhe José Martínez duhet të rishikojë të ardhmen, për shkak të mungesës së hapësirave.
Në mbrojtje, kontratat e Francesco Acerbi, Matteo Darmian dhe Stefan de Vrij nuk pritet të rinovohen. Interi synon të mbështetet te emra më të rinj si Alessandro Bastoni dhe Yann Bisseck, ndërsa Manuel Akanji shihet si përforcim i mundshëm nga Manchester City.
Në mesfushë, Hakan Çalhanoğlu mund të largohet në rast oferte konkrete, me Galatasaray që ka shprehur interes. Ndërkohë, Henrikh Mkhitaryan pritet të mbyllë aventurën e tij pas më shumë se 170 paraqitjeve me fanellën zikaltër.
Sa i përket krahëve, Denzel Dumfries është në radarët e Liverpool-it, me një klauzolë lirimi prej 25 milionë eurosh. Interi është i hapur edhe për oferta për Davide Frattesi dhe Luis Henrique.
Në sulm, situata më delikate lidhet me Marcus Thuram. I ardhur si transferim i lirë në vitin 2023, ai vlerësohet rreth 60 milionë euro, por forma e paqëndrueshme këtë sezon mund ta shtyjë klubin të marrë në konsideratë largimin e tij.
Mes gjithë këtyre ndryshimeve, një pikë e qëndrueshme mbetet pankina: Cristian Chivu pritet të rinovojë kontratën me Interin deri në vitin 2028, me opsion zgjatjeje edhe për sezonin pasardhës./ Zoom.al
